Proverbios 26 - Biblia ande chib Romani

¹ Inai sukar te perel o iv ando milai ni te delpeke kana chiden o lliu ni te den liubao iekhe dile.

² Sargo e chirikliorra kai llan jasarde gia llal e prokestia ta ni resel ninde kana inai dos.

³ E graste morabi te sikave le e magarcho morabi te achave le a e dile morabi te chalave le.

⁴ Na de anglal e dileke prema leko dilipe soke ka ache dilo sargo vou.

⁵ De anglal e dileke pe leko dilipe, te na mislil kai si bizai.

⁶ Ko bichalel iekhe dile te inllarel iek poroka, si sargo te chinel pe porrne ta te rodel e nuzda.

⁷ Ni llal but dur iek lleno kai phirel bango ni e orba bizai kai phenel la iek dilo.

⁸ Sargo te phande o barr pe onda, isto gia si te de liubao iekhe dile.

⁹ Sargo e karrne ando va e matarneko, isto gia si e orba bizai ando mui e dileko.

¹⁰ Sargo iek lleno kai chudel e llide, isto gia si o lleno kai thovel iekhe dile te radil ande po cher.

¹¹ Gia sar o llukel irilpe kai po chadipe, isto gia o dilo irilpe kai po dilipe.

¹² Mai but sai adurichare katar iek dilo, neko katar iek lleno kai istardol but bizai.

¹³ O leno te na radil phenel: Iek liono llal mukliardo ta rodel po drom so ka jal.

¹⁴ O udar boldiniaol po sastri a o leno boldiniaol po kerveto.

¹⁵ O leno inzarel po va te lel o jape, a si leke but rado te inllarel o jape ande po mui.

¹⁶ O leno si vou peke mai bizai neko efta llene kai den orbe bizai.

¹⁷ Ko amilpe ande avereki chingar si sargo te istarel iekhe llukele katar e kan.

¹⁸ Sargo iek dilo kai chudel llide phabarde kai mundaren,

¹⁹ isto gia si gua kai kojavel pe amale ta mapalal phenel kai cherela perasa.

²⁰ Kana i achen kasta merel e iag, ta kana inai bune achel e chingar.

²¹ E angara ta e kasta phabaren e iag a o lleno kai jalpe phabarel e chingar.

²² E bune katar o lleno kai inllarel e orbe si sargo o jape guglo, kai del andre ando lli.

²³ E alava gugle katar o kojamno si sargo iek piri chikaki uchardi ando rup.

²⁴ Ko murzil ni achardol leke ande orba a andral mislilpe te cherel o bilachipe.

²⁵ Kana ka del tuia orba postenimaia na pacha le soke but bilachipe si ande leko lio.

²⁶ I te mangela te guruvela pi joli, angla e llene ka ikanel katar po lio sa pi joli.

²⁷ Ko anavel ande phuv isto vou ka perel endre, ko taulil iek barr ka perel pe lete.

²⁸ O kojamno murzil pe gola kai dukhada, o lleno kai blagosil kojaimaia rodel e nuzda.