Proverbios 25 - Biblia ande chib Romani

Duito alava bizai katar o Salomon

¹ I gala si e alava bizai katar o Salomon, kai pisisarde len pale e llene katar o Ezekias, charo katar o Juda.

² Baripe e Devleko si te guruvel iek ezgoda, a blagosipe e charoko si te dikhel so si andre.

³ Chak upre ando miloso, chak andre ande phuv ta ando lio katar e charura nasti delpe andre ande lende.

⁴ O lleno kai radil o rup bilavel le, chistol le ta cherel letar eik ezgoda but sukar,

⁵ ikan e bilache llene kai radil e charoke, ta leko trono ka avel zuralo ando chachipe.

⁶ Na bariar tu tut angla o charo, ta na thov tut po than katar e glamne llene,

⁷ Soke mai sukar si te ikharen tut upre, neko te ja lallao angla o charo. So dikhea che akhenchar

⁸ na sigar te inllare le pe kris, soke aver lleno sai phenel kai kojave ta ni ka llane so te chere.

⁹ De anglal goleke kai dosarel tut, a na phen e ezgode kai guruvel aver lleno,

¹⁰ soke vareko sai asunel ta ka mukel tut ando lallao ta nasti ka le tutar chi bilachi viasta.

¹¹ E alava kai phendon orta po vreme si sargo phabaia sunakune marde ando rup.

¹² Sargo angrusti ta sinlliri sunakune, si kana den po lleno kai llanel te asunel.

¹³ O lleno bichaldo kai si chacho pe gazdake si sargo o iv ande iek llive kai cherel tatipe, soke del nevi zor pe gazda.

¹⁴ Sargo balav ta oblakura kai ni anen bursin, gia si e llene kai falinpe kai den a ni cheren le nikada.

¹⁵ Terpisar ta ka achave e joli, e alava gugle phagen e zor.

¹⁶ Te maladan aullin na ja but, soke sai cherel tut te chade le.

¹⁷ Te llelan kai cho amal, na cher le but droma, soke sai chiniol tutar ta ka murzil pe tute.

¹⁸ Pulso, jarni, llida kai pusavel, gia si ko del orba kojamni katar po amal.

¹⁹ Te uzdi tut ande iek kojamno kana si nuzda, si sargo iek porrno estuknime o iek dand phago.

²⁰ Te llilabe e lleneke kai si dukhado si sargo te thove mol sukli pe iek chindipe o te ikane che patave tutar kana cherel sil.

²¹ Te si bokhalo gua kai murzil pe tute de le te jal, a te si trusalo de le te piel pai,

²² gia ka chere te phabol lallaimatar ta o Del ka pochinel chuke.

²³ E balav katar o norte anel o bursin, e orbe kojamne anen e muia gorchome.

²⁴ Mai preche si te zivi pe iek rig upral po cher, neko ando baro cher iek baro cher iekhe diskiniaia balavi.

²⁵ Sargo pai sudro ando mui trusalo gia si e lachi viasta kai avel katar aver phuvia.

²⁶ Sargo o pai kai likel katar e phuv ta meliaren le, gia si o chacho kai perel angla o lleno bilacho.

²⁷ Inai sukar te ja but aullin, ni te rode cho blagosipe inai blagosipe.

²⁸ Sargo iek foro kai inai le zidura te arakhen le, gia si o lleno kai nasti achavel vou pe.