Proverbios 24 - Biblia ande chib Romani

- 19 -

¹ Na joliao pala so si e bilachen ta na mang te ave lenchar,

² soke lengo lio mislilpe ando choripe, ta den orbe bilache.

- 20 -

³ Llanglimaia cherdol o cher, bizaimaia thodon e zidura,

⁴ Bizaimaia phere leke sobe katar suako barvalipe ta sukaripe.

- 21 -

⁵ O manus bizai si zuralo, o llanglo si le zor.

⁶ Soke bizaimaia ka lla te mare tut ta pala e orbe bizai kai sikaven ka dobi.

- 22 -

⁷ O dilo ni llanel so ka phenel pe kris, ni putarel po mui angla o udar.

- 23 -

⁸ Ko mislilpe te cherel o bilachipe, llal leki viasta kai si bilacho.

⁹ E mislura e dileke si o bilachipe, ¡niko nasti terpil e bilache llene!

- 24 -

¹⁰ Te avea leno ando llive kai si te radi, chi zor si but minoni.

- 25 -

¹¹ Braduisar golen kai chinade lenge o meripe, ikan katar e nuzda golen kai si te mundaren len.

¹² I te phenea kai ni llanea niso, gua kai krisil e mislura ta llanel so si ande amare lie, vou pochinel suakoneke prema so cherel.

- 26 -

¹³ Ja chaurrea o aullin, ja o guglipe katar o kuibo e binduvorengo.

¹⁴ Isto gia gugle ka aven chuke o bizaipe ta o llanglipe te maladan len ka le so perel tut ta ni ka jasare nikada so adurichare.

- 27 -

¹⁵ Nikada na misli te chere o bilachipe e lleneke kai si chacho, ta na phag so si ande leki chara,

¹⁶ soke i te perel efta droma, pale ka ustel, a e bilache llene ka peren ando bilachipe.

- 28 -

¹⁷ Na asa kana cho dusmano perel, kana ka eskombal te na veselilpe cho lio,

¹⁸ soke o Del ka dikhel ta ni ka avel leke drago, ta ka lel pi joli letar.

- 29 -

¹⁹ Na murzisar pe llene bilache ta te na avel chuke joli pala e bilache,

²⁰ soke inai lacho o son katar o bilacho, ta e memeli katar e bilache llene ka merel.

- 30 -

²¹ De liubao e Devle ta e charo, na lla e llenenchar kai pheruven po mislo,

²² soke lengi zatrania ka avel oma, ka avel pe lende ta i pe tu, ¿ta ko llanel so sai avelpe?

²³ I gala si alava kai phende e bizai: Inai sukar pe iek kris, te thoven sama iekhe lleneke a ogoleke iok.

²⁴ Ko krisil e kojamne ta phenel kai si chacho, sa e phuvia ta e forura ka murzin pe lete,

²⁵ a gola kai dukhaven gole kai si dosalo ka zivin vesele ta ka len baro blagosipe.

²⁶ Sargo iek chumidipe pe us si o lleno kai del anglal chache orbaia.

²⁷ Lachar chi buchi pe droma ta cher cho rado ande umalia, ta mapalal ka vazde cho cher.

²⁸ Na de orba kojamni katar o lleno kai zivil pasa tu ta na phen kai si chachipe iek kojaipe.

²⁹ Na phen nikada kai ka ikane chi duk, o kai ka pochine gia sar cherde chuke.

³⁰ Nakhlem pasa e umal katar o leno ta pasa e umal e drakhenge katar o dilo,

³¹ ta ande sa goia umal barile e karrne, ta e barra katar e bar sea peradine.

³² Gaia ezgoda gurudem la ande mo mislo, dikhlem ta sikilem gaia ezgoda:

³³ Kana tu le te sove ta phanglion che akha ta khuve che va te sove mai sukar,

³⁴ o chorripe ka avel pe tute sargo iek chudino.