Proverbios 22 - Biblia ande chib Romani

¹ O lacho manus mai mol le neko o rup ta o sunakai.

² Maskar o barvalo ta o chorro si iek ezgoda, kai o Del cherda e duien.

³ O lleno bizai dikhel o bilachipe ta gurudol, a e dile nakhen ta len e duk.

⁴ Ko inai barikano ta del liubao e Devle, ka lel barvalipe, liubao ta zivoto.

⁵ Po drom e bilacheko si ezgode kojamne, a ko arakhel po zivoto ka duriol lendar.

⁶ Sikav e minone ande leko zivoto, ta ni ando po phuripe ni ka bristarel so sikilo.

⁷ O barvalo gazdaril pe chorre, ta ko si unllile si sluga katar gua kai dia le.

⁸ Ko thovel ande phuv e simicha katar o bilachipe, ka bariol leke e zatrania, ta o kas katar leko joli ka phagol.

⁹ Ko dikhel pe aver lachimaia ka avel blagosime, soke dia marrno e chorre.

¹⁰ Trade gole kai kusel ta e chingar ka llaltar ta niko ni ka jalpe ta ni ka marelpe.

¹¹ O charo volil gole kai leko lio si chisto, ta o lleno kai del orba sukar si leko amal.

¹² O Del dikhel po bizai, a cherel te na acharen e bilache.

¹³ O leno phenel kai po drom si iek liono, ta kai ka jal le te llelo avri.

¹⁴ E us katar e diskinia avereki si iek baro bunari, o lleno kai o Del ka joliaol pe lete ka perel andre.

¹⁵ E terne mislinpe ezgode dile, a iekhe kastea ortonpe gola mislura.

¹⁶ Ko barvaol pe duk e chorreki, o ko del e barvale, ka chorraol.

E tranda orbe katar e llene bizai

¹⁷ Thou sa e sama pe orbe e bizaienge, mislisao ande so sikavav tut.

¹⁸ Soke ka avel chuke drago te guruve len ande cho lio ta te phene len iek pala aver.

¹⁹ Allive phendem len i chuke te sai uzdi tut ando Del.

²⁰ Me pisisardem chuke tranda orbe kai sikaven tut ta den tut bizaipe,

²¹ te sai pinllare o chachipe katar e alava chachune, ta te inllare alava chachimake e llenenge kai bichalde tut.

- 1 -

²² Na chor e chorre soke si chorro, ta na dukhav le pe kris.

²³ Soke o Del ka krisil lenge, ta ka lel o zivoto katar gola kai choren len.

- 2 -

²⁴ Na cher tut amal katar o silno ta na lla e lenenchar kai joliaon oma,

²⁵ soke sai siko lendar o bilachipe ta sai thove cho zivoto po meripe.

- 3 -

²⁶ Nikada na de cho alav te ache lacho po unllilipe avereko,

²⁷ soke te inai tut sar te pochine ka len tutar i cho kerveto.

- 4 -

²⁸ Na cher mai bari e umal kai phangle che papura.

- 5 -

²⁹ Ko cherel sukar po rado ka radil e charonenge ta ni ka radil fikake.