Proverbios 21 - Biblia ande chib Romani

¹ Sargo o pai katar iek len si e mislura e charoke ande va e Devleke, ta inllarel le kote kai o Del mangel te llal.

² O manus mislil kai si sukar sa so cherel, a o Del si kai krisil leke mislura.

³ Te ave chacho ta te chere o chachipe e Devleke si mai drago neko te de kurbanura.

⁴ O baripe, o istardipe, ta o mislo e bilachengo, gala ezgode si bilachipe.

⁵ O lleno kai mislinpe liken leke sukar e ezgode, a ko sigarel, sogo cherel chorravel le.

⁶ E love kai lenpe kojaimaia, ni mol len niso e llenenge kai rodel o meripe.

⁷ E bilache isto lengo silnope ka zatril len, soke ni kamen te aven chache.

⁸ O drom e bilacheko si bango ta darano, a e ezgode kai cherel o manus chisto si orta.

⁹ Mai lache si te zivi pe iek rig upral po cher, neko ande iek baro cher iekhe diskiniaia balavi.

¹⁰ O bilacho samo mislilpe te cherel o bilachipe, nikada ni dikhel lachimaia pe aver lleno.

¹¹ Kana dukhaven gole kai istardol, gua kai ni llanel bizaol, A kana den po bizai sikol bizaipe.

¹² O Del o chacho dikhel po cher e bilacheko, ta zatril e bilachen.

¹³ O lleno kai ni asunel o molipe e chorreko, i vou ka mangel ta niko ni ka asunel le.

¹⁴ Iek ezgoda dini po chorial, achavel e joli ta o silnope.

¹⁵ O chachipe veselil e chache, a gua kai cherel o bilachipe zatril le o chachipe.

¹⁶ O lleno kai duriol katar o bizaipe, ka merel.

¹⁷ O lleno kai rodel e sinia, e mol, ta o meriso, nikada ni ka aven le love.

¹⁸ O kojamno ta bilacho ka pochinel po than katar o chacho ta orta.

¹⁹ Mai lache si te zivi po pusto neko iekhe diskiniaia kai joliaol ta balavil.

²⁰ Barvalipe ta zeitino si ando cher e bizaieko, a o dilo jal sa so si le.

²¹ Ko llal pala o chachipe ta pala e zalba ka malavel o zivoto o chachipe ta o liubao.

²² O bizai del te marelpe ando foro o zuralo, ta peravel lenge zidura kai arakhena len.

²³ Ko arakhelpe ande orbe kai del nikada ni thovelpe ande nuzda.

²⁴ Barikano ikhardol gua kai cherel baripe ta istardol ande ezgode barikane kai cherel.

²⁵ E ezgode kai zelil o leno mundaren le, soke leke va ni kamen te radin.

²⁶ Sorro llive zelil e ezgode, a o chacho del ta ni achavel peke niso.

²⁷ O del ni terpil o kurbano e bilachengo, soke cheren le ande iek mislo bilacho.

²⁸ O lleno kai kojavel pe iek orba ka avel zatrime, a ko llanel te asunel sai ka del orba.

²⁹ O lleno bilacho cherel pe kai inai le nuzda, a o lacho lacharel po zivoto.

³⁰ Angle o Del ni mol niso o bizaipe, ni o llanglipe.

³¹ O manus lacharel pe graste te llal te marelpe, a o Del si kai cherel le te dobil.