Proverbios 20 - Biblia ande chib Romani

¹ E mol cherel e manuse te mare espurnia, e rachia matarel le, kogo perel pe lende inai bizai.

² Iek charo joliariko si sargo o liono kana basel, ko joliavel le thovel po zivoto po meripe.

³ O baripe e manuseko si te achavel e chingar, a varesavo dilo sai cherel te marenpe.

⁴ Kana si o vreme te radilpe e phuv o leno ni cherel le, a kana ka chiden so dia e phuv vou rodel so te jal ta ni malavel.

⁵ Ande mora katar e mislura jasaon e orbe bizai, a o manus llanglo malavel len.

⁶ But llene phenen kai von si postene, a nasti uzdi tut ande ni iek.

⁷ O lleno orta zivil ando chachipe, ¡Blagosime ka aven leke chaurre mapalal letar!

⁸ Iek charo besel po trono e krisako, samo kai dikhel achavel sa o bilachipe,

⁹ Niko nasti phenel: Chistosardem mo lio, ta inai man ni iek bilachipe.

¹⁰ Phariadipe kojamno ta pharipe kai kojavel si e dui ezgode kai e Devleke inai drago.

¹¹ I prema so cherel iek terno pinllardol dal llal orta pe po zivoto.

¹² E kan kai asunen ta e akha kai dikhen, e duien cherda o Del.

¹³ Na de tut ande lindri te na chorrao, achi llungado ta ka avel tut but jape.

¹⁴ O lleno kai chinel phenel: Inai lachi gaia ezgoda, a kana chinel la ta avel chere blagosil vou pe.

¹⁵ Mai preche si e orba bizai neko ni iek sukaripe sunakuno.

¹⁶ Katar o lleno kai achel lacho pe avereko unllilipe le letar leke patave ta achav len tute pala o dugo.

¹⁷ E manuseke o kojaipe si sargo sukar jape, a mapalal ka avel leke sargo te jal e chik.

¹⁸ E mislura ortonpe anda iek orba bizai, Ta mai anglal te llalpe po maripe mislinpe sar ka cheren le.

¹⁹ O lleno kai inllarel e bune nasti terpil, na lla ninde e llenenchar kai ni achaven pi chib.

²⁰ Ko proketil pe dade o pe da, ka merel laki memeli ando baro truniariko.

²¹ Sogo dobilpe but oma, mapalal ni ka avel chuke po blagosipe.

²² Na phen nikada kai ka ikane chi duk, muk pe Devleko ta vou ka braduil tut.

²³ E Devleke inai drago o pharipe kojamno, ta inai leke drago kana phariaven kojaimaia.

²⁴ O Del inllarel a manuse po zivoto, niko ni llanel so ka avelpe mai angle.

²⁵ Ande iek bari dar thovelpe o lleno kai del po alav e Devle ta ni cherel le.

²⁶ O chari bizai duriavel petar e bilachen ta del upral pe lende iekhe tochkoia.

²⁷ O duo e manuseko si e lampara e Devleki ta dikhel laia andre ando mislo e manuseko.

²⁸ E zalba ta chachipe arakhen e charo, pala o postenipe leko trono si pe porrne.

²⁹ O baripe e ternengo si lengi zor, a o sukaripe e phurengo si lenge balparne.

³⁰ E duk kai mukel o bicho si o drab e bilachenge, o chaladinipe sastarel e mislura.