Proverbios 2 - Biblia ande chib Romani

Savo lachipe del o bizaipe

¹ Cher chire me alava, chaurrea, guruv ande che mislura me zakonura.

² Thou sama po bizaipe, thov che mislura ando llanglipe.

³ Mang sa che liea o bizaipe ta lacho mislo,

⁴ thov sa chi zor te rode len, sargo kana rode o rup o iek barvalipe gurudino.

⁵ Ondaka ka llane so si te blagosi e Devle ¡ta ka llane so si te pinllare e Devle!

⁶ Soke o vou del o bizaipe, o llanglipe ta o sikadipe liken katar e Devleko mui.

⁷ O Del pomozil ta arakhel golen kai zivin orta ta si tamam,

⁸ arakhel golen kai zivin ando chachipe, golen kai kanden le.

⁹ Ta i ka llane so si orta ta chacho, ta ka thove sama pe sa so si lacho,

¹⁰ ta gia ka le o bizaipe ta ka achare o guglipe katar o bizaipe.

¹¹ E mislura chache ta o bizaipe ka arakhen tut,

¹² von ka ikanen tut katar o bilacho drom ta katar e llene bilache,

¹³ katar gola kai muken o lacho drom ta phiren po drom o truniariko,

¹⁴ gola kai lengi dragostia si te dukhaven ta veselinpe kana cheren le,

¹⁵ gola kai llan pe droma bange ta durile katar o drom o orta.

¹⁶ O bizaipe arakhel tut katar avereki rromi, goia kai ni pinllare ta diliarel pe alavenchar

¹⁷ goia kai mukel pe manuse katar lako ternipe ta bristarelpe katar o alav kai dia e Devle.

¹⁸ Te istare o drom kai inllarel kai lako cher si sargo te istare o drom kai inllarel kai o meripe,

¹⁹ gola kai den ande lako cher nikada ni ka irinpe, nikada ios ni ka phiren po drom e zivotoko.

²⁰ Goleke, phir po lacho drom, ta cher sar cheren e chache.

²¹ Soke gola kai zivin orta ta tamam ka zivin pe gaia phuv,

²² a e bilache ta e kojamne ka aven ikande ta chudine katar e phuv.