Proverbios 19 - Biblia ande chib Romani

¹ Mai preche si te ave chorro ta chacho, neko te ikane bune ta te ave dilo.

² Kor ni mislilpe mai anglal ni cherel sukar, ta ko sigarel te phirel jasaol.

³ O bilachipe e manuseko bangarel leko drom, ta mapalal o manus joliaol po Del.

⁴ E love cheren te aven but amal, a o chorro si fulado katar po amal.

⁵ Gua kai kojavel pe iek orba ka avel leke pochindo, ta o kojamno nasti ka nasel.

⁶ But llene roden gole kai si posteno, ta sa si amal katar gua kai del averen.

⁷ Sa e phlal katar o chorro murzin pe lete, a ios mai but ka durion letar leke amal. Rodel te perel lenge drago alavenchar ta nasti cherel te volin le.

⁸ Ko si bizai volil vou pe, o lleno kai llal pala o bizaipe ka malavel o lachipe.

⁹ O lleno kai kojavel pe iek orba si te pochinel, ta ko del orbe kojamne ka avel zatrime.

¹⁰ Inai prema iek dilo te zivil ando baripe, ¡ni prema iek sluga te gazdaril maskar e charura!

¹¹ O bizaipe e manuseko achavel leki joli, a leko liubao si te na thovel sama kana dukhaven le.

¹² E joli e charoki si sargo kana basel iek liono, a kana si posteno si sargo kana pechalpeke pe char.

¹³ Iek chaurro dilo del joli pe dade. E diskinia balavi si sargo kana thavdel o pai ta ni achel.

¹⁴ O cher ta barvalipe den len e dada, a iek rromi bizai del la chuke o Del.

¹⁵ O lenope cherel te pere ande bari lindri, ta o leno ka nakhel bok.

¹⁶ Ko cherel so phenel iek zakono arakhel po zivoto, a ko ni thovel sama po sikadipe ka merel.

¹⁷ Kana de unllile e chorre de unllile e Devle, ta isto o Del ka pochinel.

¹⁸ Sikav che chaurre te dikhea kai sai sikol, ta na cher le sigardo te na mundare le.

¹⁹ O lleno kai joliaol but si te lel e zatrania, a te si silno ios mai gore ka llal leke.

²⁰ Asun kana den pe tute ta kande kana sikaven tute, ta gia ka ave bizai.

²¹ But ezgode mislilpe o te cherel manus, a samo so phenel o Del cherdol.

²² So mangelpe katar iek manus si te kandel, mai mol iek chorro neko iek kojamno.

²³ Te de liubao e Devle inllarel tut kai o zivoto, ka zivi veselo ta ni ka nakhe ni iek bilachipe.

²⁴ Ko si leno inzarel po va te lel o jape, a ni thovel o jape ande po mui.

²⁵ Dukhav gole kai istardol ta sikol, a o bizai sikol samo te de pe lete.

²⁶ Ko lel pe dadeke ezgode ta tradel pe da, cherel lenge o mai baro lallao ta bilachipe.

²⁷ Chaurrea, na asun ios o sikadipe kai duriavel tut katar e mislura bizai.

²⁸ O kojamno ande pi orba ka marel espurnia katar o chachipe, ta e alava e bilachenge ka ucharen o bilachipe.

²⁹ Lachardi si e kris golenge kai maren espurnia, ta o bicho te chaladol pe zea e dilenge.