Proverbios 18 - Biblia ande chib Romani

¹ Ko zivil dur katar e llene dikhel samo vou peke ta joliaol kana vareko sikavel le fiso.

² O dilo inai leke drago te sikol a drago leke te dikhen kai ni llanel.

³ Kana avel o lleno bilacho avel o lallao, ta o lallao anel e espurnia.

⁴ E alava e manuseke si sargo iek baro pai, sargo iek pai kai del avrial, iek bunari llanglimako.

⁵ Inai sukar te dobil o dosalo pe iek kris, ta te na krisin orta e chache.

⁶ E orbe e dileke thoven le ande chingar, ta leke alava cheren te avel mardino le.

⁷ E alava e dileke zatrin isto le, ta leke orbe si sargo iek solo pe leki korr.

⁸ E bune katar o lleno kai inllarel e orbe si sargo o jape guglo, kai del andre ando lli.

⁹ O lleno kai si leno ande po rado si phlal goleko kai zatril.

¹⁰ O anav e Devleko si iek cher zuralo kai aven lete e llene chache te arakhel len.

¹¹ O barvalo mislil kai leko barvalipe sargo eik foro phanglo ande bare zidura.

¹² Kote kai si baripe avel e zatrania, a kote kai inai baripe avel o blagosipe.

¹³ Dilipe ta lallao si te de orba mai inglal te asune.

¹⁴ E vlaga e manuseki cherel te terpil po nasualipe, ¿a te inai vlaga sar ka terpi?

¹⁵ E llene kai rodel o llanglipe, len o bizaipe kai roden.

¹⁶ Kana de varaka fiso ortolpe cho drom ta rese angla e bare udara.

¹⁷ O purvo lleno kai chacharelpe cherel te misli kai phenel o chachipe a avel gua kai kajpe lea ta phenel o chachipe.

¹⁸ Kana muken pe Devleko lachardon e krisa, ta cherel te chinen kris gola kai marenpe.

¹⁹ Iek phlal joliariko phangliol sargo iek foro ande zidura. E joli maskar e phlal si mai zurali neko e udara katar iek cher barrustuno.

²⁰ Suako lleno lel prema e orba kai del chaliol katar e alava kai phenel.

²¹ E orba si la po zivoto ta po meripe, ko del but orbe ka avel leke pochondo.

²² Kor malavel peke rromi malavel o lachipe, ta o Del dikhel pe lete lachimaia.

²³ Kana o chorro del orba molilpe a o barvalo del anglal silnomaia.

²⁴ O lleno kai si le amal si te avel amal, A si nesave amal kai si mai but neko iek phlal.