Proverbios 17 - Biblia ande chib Romani

¹ Mai preche si te ja kotor marrno ande pas, neko te ja but mas ta te ave ande joli.

² O sluga bizai gazdaril po chavo kai del lallao, ta i lel so len ogola phlal.

³ Ande iag zumadol o rup ta o sunakai, a o Del zumavel e lie.

⁴ O bilacho ta o kojamno thoven sama pe orbe kojamne ta bilache.

⁵ Ko marel espurnia katar o chorro marel espurnia katar o Del, ko veselilpe katar leki belava ni ka achel bi te pochindol leke.

⁶ E unukura si e korona katar e phure, o baripe e chaurrengo si lenge dada.

⁷ Inai prema o dilo te del orbe glamne, ni prema o lleno liubaimako te kojavel.

⁸ Ko pochinel te cheren pe leko mislilpe kai cherel iek ezgoda but glamni, soke llal leke sukar pe sogo cherel.

⁹ Ko prostil kana dukhaven le rodel o volipe, a ko phenenle cherel te nasel letar leko amal.

¹⁰ Iek drom den po lleno bizai ta mai kandel, neko stotina droma te chalaven e bichoia iekhe dile.

¹¹ Ko ni kandel samo rodel te marelpe, a ka avel bichaldo iek leno bilacho kai ka marel le.

¹² Mai preche si te ave pasa iek melleda kai arakhel pe minonen, neko pasa iekhe dilo ande po dilipe.

¹³ Ko pochinel bilachimaia po lachipe ni ka llaltar o bilachipe katar leko cher.

¹⁴ O lleno kai rodel te marelpe si sargo iek len kai likel avri, mai lache si te nase ta te na ami tut lea.

¹⁵ Te prostilpe e dosale ta te dosarelpe e chache, si dui ezgode kai o Del nasti terpil.

¹⁶ Iek dilo lovenchar ando va nasti chinel o bizaipe soke ni acharel niso.

¹⁷ Iek amal volil tut sa o vreme ta kana avel e nuzda si sargo iek phlal.

¹⁸ O lleno dilo pochinel avereko onllilipe ta achel lacho pala le angla po amal.

¹⁹ Kake si drago o bilachipe, drago leke te marelpe, Gua kai istardol rodel pi zatrania.

²⁰ Ko si bilacho andral ni ka malavel o lachipe, o kojamno ka perel ande bilachipe.

²¹ Ko si dad katar iek dilo nakhel duk, o dad katar iek chaurro kai ni sikol inai veselo.

²² O lio veselo si o mai lacho drab, a o duo tristome sukarel e kokala.

²³ O lleno bilacho pochinen leke po chorial, te bangarel o chachipe.

²⁴ Po mui e bizaieko sikadol o bizaipe, a o dilo ni llanel so rodel.

²⁵ O chaurro dilo del joli ta zalba pe dade ta pe da.

²⁶ Nasti dosarelpe gole kai inai dosalo ta nasti dukhadol gole kai si le liubao ta si chacho.

²⁷ O lleno bizai ni del but orbe o lleno llanglo llanel te mislilpe.

²⁸ Llik o dilo kana ni del orba dikhol bizai, kana phandel po mui nakhel sargo llanglo.