Proverbios 16 - Biblia ande chib Romani

¹ O manus mislilpe te cherel e ezgode, a o Del phenel sar ka cherdon,

² O manus mislil kai sogo cherel si sukar, a o Del pinllarel o lio e manusengo.

³ Muk ande Devleke va so mange te chere, ta ka del tut e zor te cherdon.

⁴ O Del cherda sa pala iek ezgoda, i gole kai ni pachal te sai avel ando llive bilacho.

⁵ O Del nasti terpil e llenen kai istardon, a si te pochinen po bilachipe.

⁶ O volipe chachuno prostil o bilachipe, Ko del liubao e Devle duriol katar o bilachipe.

⁷ Kana e Devleke si drago sar zivil ie lleno, i leke dusmanura si lea ande pas.

⁸ Mai preche si te le cherricha chachimaia, neko te le but kojaimaia.

⁹ O manus mislilpe ando po drom, a o Del ortol leke korakura.

¹⁰ O charo del orba chachimaia, ta ni ka chinel iek kris bangi.

¹¹ Samo o Del llinel ta phariarel chachimaia, leke si sa e ambave kai phariaven lenchar.

¹² E charura joliaon kana inai zalba, soke lengo trono si thodo ando chachipe.

¹³ E charura veselinpe pe orba chachi, volin gole kai phenel so si orta.

¹⁴ E joli e charoki inllarel o meripe, a o manus bizai ka achavel le.

¹⁵ Kana o charo asal si kai ka avel zivoto, ta leko postenipe si iek oblako pherdo pai.

¹⁶ Te le bizaipe ta llanglipe mai mol neko te le rup ta sunakai.

¹⁷ E llene chache durion katar o bilacho drom, o lleno kai arakhel katar llal arakhel po zivoto.

¹⁸ O istardipe inllarel kai e zatrania, o baripe avel mai anglal te pere.

¹⁹ Mai preche si te ave prosto maskar e chorre, neko te barvalo maskar e barikane.

²⁰ Ko thovel sama pe alava llal leke sukar, ¡blagosime o lleno kai uzdilpe ando Del!

²¹ Ko mislilpe bizaimaia phenen leke bizai, e alava postene bariaren o bizaipe.

²² Ka si o bizaipe si le sargo iek pai zivotoko, te sikave e dilen si iek dilipe.

²³ Ko llanel te mislilpe llanel te del orba, ta bariol o bizaipe katar leke alava.

²⁴ Sargo aullin si e alava kovle, gugliaven o zivoto ta den sastipe.

²⁵ Si droma kai o manus dikhel len orta, a lengo son si o meripe.

²⁶ O manus radil te pravarelpe soke e bok cherel le te radil.

²⁷ O lleno bilacho anavel ando bilachipe, ta ande leko mui si iag kai phabol,

²⁸ O lleno bilacho cherel te marenpe, ta ko del averenge orbe fulavel e amalen.

²⁹ O lleno bilacho kojavel pe amale ta cherel le te llal po bilacho drom.

³⁰ O lleno bilacho phandel pe akha te mislilpe ando bilachipe, miskol po mui ta cherel o bilachipe.

³¹ E bal parrne si iek korona kai del liubao, ta maladol po drom katar o chachipe.

³² Mai preche si te terpi neko te ave tromano, te gazdari pe tute neko te gazdari pe iek foro.

³³ O manus rodel pi baj, a o Del cherel e ezgode.