Proverbios 15 - Biblia ande chib Romani

¹ E orba posteni achavel e joli, a e orba silni ios mai joliavel.

² Katar o mui e bizaiengo likel o bizaipe, a o mui e dilengo rispil o dilipe.

³ O Del si pe suako rig, ta dikhel pe lache ta i pe bilache.

⁴ E orba posteni si iek kas kai del zivoto, a e orba bilachi dukhavel o duo.

⁵ O dilo ni thovel sama pe dadeke kana ortol le, a gua kai thovel leke sama si bizai.

⁶ Ando cher e chacheko si but barvalipe, a o chari e bilacheko anel leke nuzde.

⁷ E bizaiengo mui chudel petar o bizaipe, a e dile ni mislinpe ande gala ezgode.

⁸ O Del nasti terpil e ezgode dine katar e bilache, a lel veselimaia o molipe katar e lache.

⁹ O Del nasti terpil sar zivin e bilache, a volil gole kai llal chachimaia.

¹⁰ Ko mukel o drom dukhaven le te ortolpe ko inai leke drago te orton le ka merel.

¹¹ O meripe ta o limori si angla o Del, ¡gachin mai but si e lie e manusenge!

¹² o barikano murzil pe gua kai del pe lete, ta ni chidiniaol e bizaienchar.

¹³ O lio veselo cherel te asal o mui, a o lio tristo cherel le te rovel.

¹⁴ O mislo bizai rodel o bizaipe, a e dile jan katar o dilipe.

¹⁵ O dukhado suako llive si leke trudno, a o lleno veselo suako llive si le iek baro jape.

¹⁶ Mai preche si te ave chorro ta te de liubao e Devle, neko barvalo ta ando bilachipe.

¹⁷ Mai preche si te ja septelie ande veselia, neko te ja mas guruvano ande joli.

¹⁸ O lleno silno cherel te marenpe, a o lleno kai terpil e joli achavel la.

¹⁹ O drom katar o leno si pherdo karrne, a o drom katar o chacho si orta.

²⁰ O chaurro bizai veselil pe da ta pe dade, a o dilo ni thovel lenge sama.

²¹ E veselia e dileki si leko dilipe, o bizai ortol po drom.

²² Kote kai niko ni puchel nasti lla angle, a kana but llene sikaven sai chere so mange.

²³ ¡Gia sukar si te phenen so mangea te llane, ta ios mai sukar kana phenen le orta po vreme!

²⁴ O drom e zivotoko llal upre e bizaieke, te sai duriol katar o meripe kai si tele.

²⁵ O Del zatril o cher katar o barikano, a o cher katar e phivli ni ka miskolpe.

²⁶ O Del murzil pe mislura e bilachenge, a drago leke e alava chiste.

²⁷ O jamllalo pe love muril po cher, a o lleno kai ni kojavel pala e love ka zivil.

²⁸ O lleno chacho mislilpe so ka phenel, a o bilacho katar po mui chudel o bilachipe.

²⁹ O Del duriol katar e llene bilache, ta asunel o molipe katar e llene chache.

³⁰ Kana klichin e akha o lio veselilpe, ta iek lachi viasta del zor ande kokala.

³¹ Kor asunel kana sikaven le sar te zivil, ka avel maskar e bizai.

³² Kor ni thovel sama kana den pe lete vou peke ni thovel sama, a o lleno kai thovel sama lel o bizaipe.

³³ Kana blagosi e Devle siko o bizaipe, te den tut liubao mai anglal si te na ave barikano.