Proverbios 14 - Biblia ande chib Romani

¹ E diskinia bizai vazdel po cher, a e dili pe vastenchar peravel le.

² O lleno kai llal orta blagosil e Devle, a ko llal bangimaia del le e zea.

³ O lleno dilo del orbe barikane, a o lleno bizai ni del but orbe.

⁴ Kana inai o guruva inai lliu, a kana si e zor e guruveki o lliu bariol.

⁵ O lleno kai del orba chachi ni kojavel, a o lleno kai ni del orba chachi kojavel.

⁶ O lleno kai ni istardol rodel o bizaipe ta ni malavel le, a e bizaieke si likho o bizaipe.

⁷ Duriu katar o lleno dilo, soke letar ni ka siko niso.

⁸ O bizaipe sikavel e bizaie so te cherel, a o dilipe e dilengo kojavel len.

⁹ E llene dile asan peke katar o bilachipe, a naskar e chache si o volipe e Devleko.

¹⁰ O lio pinllarel pi zalba, ta ni phenel pi veselia e llenenge kai ni pinllarel.

¹¹ O cher e bilachengo ka avel zatrime, a e chare e lachenge ka barion sargo lulunlla.

¹² Si droma kai dikhon orta, a lengo son si o meripe.

¹³ I kana asal o manus dukhal le leko lio, mapalal katar o asape avel e zalba.

¹⁴ O lleno dilo si veselo sar zivil, a o lacho veselilpe ande so cherel.

¹⁵ O lleno dilo pachal sa so phenen leke, a o bizai dikhel katar phirel.

¹⁶ O bizai daral katar o bilachipe ta nasel letar, a e dilo ni chitilpe niso.

¹⁷ O lleno kai joliaol oma ka cherel dilipe, ta ka murzin po lleno bilacho.

¹⁸ E dile ka len o dilipe, a e bizai ka len e korona katar o llanglipe.

¹⁹ E bilache ka bangon angla e lache, e bilache ka molinpe lenge pe lengo udar.

²⁰ Po chorro murzil i leko amal, a o barvalo but e llene si leke amal.

²¹ Kor murzil po lleno kai zivil pasa le cherel o bilachipe, a ¡blagosime gua kai si leke zalba katar o chorro!

²² Gola kai mislinpe o bilachipe llan jasarde, a gola kai mislinpe o lachipe, len volipe ta o chachipe,

²³ Suako rado del chari, a gua kai del but orbe chorraol.

²⁴ E korona e bizaiengi si lengo llanglipe, a e dilengi si lengo dilipe.

²⁵ Ko del orba chachi braduil averengo zivoto, a o lleno kai del orba kojamni mundarel.

²⁶ Kana blagosi e Devle cherel te uzdi tut, ta te avel len so te aduricharen leke chaurre.

²⁷ Kana blagosi e Devle del tut zivoto kai braduil katar e sole e marimake.

²⁸ Kana o foro si baro o charo veselilpe, a kana o foro si minono jasarel e zor.

²⁹ O lleno kai terpil si bizai, a o lleno kai sigarel sikavel po dilipe.

³⁰ O misli kai ni sigarel si zivoto e esnagake, a e joli kana avere si jaliarel e kokala.

³¹ Kor dukhavel e chorre dukhavel e Devle, a blagosil gole kai si leke zalba.

³² Pala po bilachipe o bilacho perel, a o chacho arakhel le leko chachipe.

³³ O bizaipe si ando mislo e bizaieko, a e dile ni llanen so si o bizaipe.

³⁴ O chachipe si o baripe e phuviengo, a o bilachipe si o lallao katar e forura.

³⁵ Po sluga bizai o charo dikhel lachimaia, a joliaol golea kai mukel le ando lallao.