Proverbios 13 - Biblia ande chib Romani

¹ O chaurro bizai asunel pe dade kana sikavel le, A gua kai marel espurnia ni kandel le.

² Suako lleno jal katar so del orba, a e bilachengo jape si o silnope.

³ Ko arakhel pe orbe arakhel po zivoto, a ko del but orbe ka nakhel bari nevolia.

⁴ O manus leno zelil e ezgode, a ni lel niso, a e llene kai radin ka liken angle.

⁵ O chacho murzil po alav kojamno, a o bilacho si ando lallao ta ande espurnia.

⁶ O chachipe arakhel e llene chache, a e bilache zatril le o bilachipe.

⁷ Si llene kai cherenpe barvale a inai len niso, a si llene kai cherenpe chorre a si but barvale.

⁸ O barvalo pochinel po zivoto pe lovenchar, a o chorro ni thovel sama kana daraven le.

⁹ E chache si sargo iek villelo kai kletosarel, a e lampara e bilachengi merel.

¹⁰ O istardipe cherel te marenpe, a o bizaipe si golenchar kai asunen kana den pe lende.

¹¹ O barvalipe kai lelpe oma llaltar oma, a gua kai chidel le poloke bariol.

¹² So zelilpe but vreme nasuarel o lio, a so reselpe si sargo iek kas zivotoko.

¹³ Ko ni kandel iek alav ka rovel, a ko kandel o sikadipe ka braduilpe.

¹⁴ Kana iek bizai sikavel del zivoto, ta braduil katar o sole e merimake.

¹⁵ O lleno kai mislilpe orta vilin le e llene, a e kojamnengo drom llal kai e zatrania.

¹⁶ Suako lleno bizai llal bizaimaia, a o lleno dilo sikavel po dilipe.

¹⁷ O profeta bilacho anel e nuzda, a o profeta chacho anel sastipe.

¹⁸ Ko ni thovel sama kana sikaven le anel peke chorripe ta lallao, a baro liubao lel gua kai kandel kana sikaven le.

¹⁹ Kana cherdol so zeli veselilpe o lio. A but trudno si te durion e dile katar o bilachipe.

²⁰ Lla e bizaienchar ta ka le bizaipe, lla e dilenchar ta ka muri cho zivoto.

²¹ O bilachipe llal pala e llene bilache, a e chache ka len o lachipe.

²² O lleno lacho mukel pe unukonenge so si le, a o barvalipe e bilacheko ka achel e lacheke.

²³ Ande umal e chorreki si but jape, a kana inai chachipe sa jasaol.

²⁴ Ko ni ortol pe chaurre ni volil le, a ko del pe lete kana si minono volil le.

²⁵ O lleno chacho jal ta chaliol, a o bilacho achel bokhalo.