Proverbios 12 - Biblia ande chib Romani

¹ Kor voli o sikadipe volil o bizaipe, te murzi kana den pe tute si soke ni llane niso.

² O Del lel e llene lache, a gole kai mislil te cherel o bilachipe, o Del ka proketil le.

³ O bilachipe inai le katar te istardo pe lete, e llene chache si istarde pe zile kai ni chindon.

⁴ E rromi lachi cherel katar po rrom iek charo, a e bilachi rromi cherniarel leke kokala.

⁵ E llene chache mislinpe ando chachipe, a e llene bilache samo ando kojaipe.

⁶ E orba e bilachengi kojavel ta mundarel a e orba e chachengi braduil.

⁷ E llene bilache peren ta kote si lengo son, a e llene chache achen pe porrne.

⁸ O manus si blagosime prema leko bizaipe, a o lleno bilacho niko ni thovel leke sama.

⁹ Mai mol o chorro chalio, neko o barvalo bokhalo.

¹⁰ O lleno lacho arakhel pe zivirinien, a ando lio e bilacheko inai zalba.

¹¹ Kor radil pi phuv si le so te jal, a o dilo jasare o vreme ande so ni blazil.

¹² E dragostia e bilacheki si ando mislo e bilachengo, a e llene chache si sargo kasta kai den septelie.

¹³ O bilacho kojadol isto ande pe alava, a o chacho likel katar e nuzda.

¹⁴ O manus lel o lachipe prema so phenel, suako lleneke pochindol leke prema so cherel.

¹⁵ O dilo mislil kai sa so cherel si sukar, a o bizai asunel kana sikaven le.

¹⁶ O dilo oma sikavel pi joli, a o bizai mukel te nakhel e duk.

¹⁷ Ko del orba chachi sikavel o chachipe, a gua kai del orba kojamni sikavel o kojaipe.

¹⁸ Si orbe kai chalaven sargo iek jarni a e orba e bizaieki sastarel.

¹⁹ E orba bizai ni merel nikada, a e orba dili merel isto kote.

²⁰ O kojaipe si ando lio katar gola kai mislinpe o bilachipe, a ande golengo kai mislinpe o lachipe si veselia.

²¹ Ni iek nuzda ni ka nakhel o lleno chacho, a e llene bilache ka aven pherde belava.

²² O Del murzil pe kojamne, a dikhel lachimaia pe llene kai si chache.

²³ O bizai ni falilpe katar po bizaipe, a o dilo saurrenge phenel po dilipe.

²⁴ Ko radil ka gazdaril, a ko ni radil pe lete gazdarin.

²⁵ E zalba zatril e manuse, o alav posteno veselil le.

²⁶ O lleno chacho sikavel o drom avereke, a o drom e bilachengo jasarel len.

²⁷ O lleno leno inai le so te jal, a o lleno lokho barvaol.

²⁸ Po drom katar o chachipe si o zivoto, a o drom katar o dilipe inllarel kai o meripe.