Proverbios 11 - Biblia ande chib Romani

¹ E Devleke inai drago e llene kai phariaven kojaimaia a drago leke kana phariaven chachimaia.

² Kana avel o baripe mapalal avel o lallao, o bizaipe si e llenenchar kai ni istardon.

³ E llene e orta, llan angle pala po ortope, a e llene kojamne zatril len lengo kojaipe.

⁴ O barvalipe ni ka blazil ando llive e krisako, a o chachipe braduil katar o meripe.

⁵ O chachipe ortol o drom katar o chacho, a o bilacho lleno perel isto pala po bilachipe.

⁶ O chachipe mukliarel e chache llenen, a e bilachen phandel len lengo bilachipe.

⁷ Kana o bilacho lleno merel, merel lea sa so mangel te cherel ta sa so zelil.

⁸ O Del braduil e chache katar e nuzda, ta pe leko than thovel e bilache.

⁹ O bilacho pe orbaia zatril e llenen kai si pasa le, a o bizaipe katar o lleno chacho braduil le.

¹⁰ Kana llal sukar e chachenge, o foro veselilpe, kana e bilache meren, si bari veselia.

¹¹ Kana e chache blagosin, o foro bariol, a kana e bilache den orba, avel e belava.

¹² O dilo del orba bilachi katar po amal, o bizai ni phenel niso.

¹³ O llene kai inllarel orbe, phenel sogo asunel, o lleno kai uzdi tut ande lete guruvel e orba.

¹⁴ Te inai lacho gazdaripe, o foro zatrilpe, a kana but llene sikaven, o foro sai braduilpe.

¹⁵ E briga rodel ko del unllile ka ni pinllarel, ko ni del unllile zivil esmiro.

¹⁶ E lachi diskinia lel o liubao, a o murus tromano lel o barvalipe.

¹⁷ O lleno kai si le zalba isto peke cherel o lachipe, a o bilacho isto vou peke cherel o bilachipe.

¹⁸ O lleno bilacho lel o pochindipe kojamno, a o chacho pochinen leke chachimaia.

¹⁹ Gia sar o chachipe inllarel kai o zivoto, isto gia o bilachipe inllarel kai o meripe.

²⁰ E Devleke inai drago e llene kai lengo lio si bilacho, a dikhel lachimaia pe llene chache.

²¹ Chachimaia si te pochindol e bilacheke, a e vicha e chachengi ka likel mukliardi.

²² Angrusti sunakuni ando nak e baleko si e diskinia sukar ta dili.

²³ E llene chache mangen samo o lachipe, a e bilache samo aduricharen e joli.

²⁴ Si llene kai den ta len mai but, a si aver kai chiden ta chorraon.

²⁵ O lleno kai del ka llal leke sukar, ta ko phagel avereki trus i leki trus ka phagen.

²⁶ E llene proketin gole kai guruvel o lliu, a blagosin gole kai bichinel le.

²⁷ Ko rodel o lachipe, rodrl te llal leke sukar, ko llal pala o bilachipe o bilachipe ka malavel le.

²⁸ Ko uzdilpe ande po barvalipe ka perel sargo e patra suke, a e llene chache ka zelenin sargo e krangura.

²⁹ O lleno kai ni thovel sama pe po cher ni ka achel le niso, o dilo sa o vreme ka avel sluga e bizaieko.

³⁰ O chachipe del zivoto, o silnope mundarel.

³¹ Te lela o pochindipe o chacho kate pe phuv, ¡gachin ios ka lel le o bilacho!