Proverbios 10 - Biblia ande chib Romani

Purve alava chidine katar o Salomon

¹ Alava katar o Salomon. O chaurro bizai si e veselia pe dadeki, o chaurro dilo tristol pe da.

² O barvalipe kai lelpe bilachimaia ni blazil, a o chachipe braduil katar o meripe.

³ O Del ni mukel te nakhel bok o lacho, a e bilache ni mukel le te phagel pi bok.

⁴ Cherricha rado si chorripe, but radi si barvalipe.

⁵ E llene lache chiden kana si o milai, e llene barikane soven kana si te chiden.

⁶ Po lleno lacho delpeke o blagosipe, a o lleno bilacho tasavel le o silnope.

⁷ Katar o lleno lacho denpe golli blagosimaia, a katar o lleno bilacho bristarenpe oma.

⁸ O lleno bizai kandel e zakonura, a o lleno kai del orbe dile jasarel sa.

⁹ O lleno kai llal orta ni daral, a o lleno kai llal bangimaia jasarel kana llangliolpe so cherel.

¹⁰ O lleno kai chudel e akhaia anel but bilachipe, o lleno kai del orbe dile jasarel sa.

¹¹ E alava katar o lleno chacho den zivoto, a o lleno bilacho tasavel le o silnope.

¹² E joli cherel te marenpe, a o volipe cherel te prosti suako bilachipe.

¹³ Ando mui katar o llanlglo si bizaipe, a e dileke zea si chaladine iekhe kastea.

¹⁴ E bizai guruven po bizaipe, a kana e dile den orba, avel e nuzda.

¹⁵ E barvale arakhel le leko barvalipe, a e chorre zatril le leko chorripe.

¹⁶ O lleno chacho si te lel o zivoto, a o lleno bilacho chidel o bilachipe.

¹⁷ O lleno kai thovel sama po sikadipe llal karing o zivoto, a gua kai ni thovel leke sama, llal karing o meripe.

¹⁸ O lleno kojamno guruvel e joli, ta o lleno kai inllarel orbe kojamne si dilo.

¹⁹ O lleno kai del but orbe, but kojadol, a o bizai llanel kana si te achel.

²⁰ O mai lacho rup si e chib katar o chacho, a e golli katar o lleno bilacho ni mol la niso.

²¹ E orba kai del o chacho sikavel bute llenen, a o dilo mundarel le leko dilipe.

²² O blagosipe e Devleko si iek barvalipe kai ni anel pea e duk.

²³ E dileke si drago te cherel o bilachipe, a o bizai veselilpe ando bizaipe,

²⁴ Katar so mai daral o lleno bilacho isto gua nakhel, a sogo zelil o lleno chacho cherdol leke.

²⁵ O bilacho llaltar kana nakhel iek bari balav, a o lleno chacho achel ostade.

²⁶ O lleno leno si e lleneke kai bichalel le, sargo e mol sukli pe danda, ta o thuv ande akha.

²⁷ Kana blagosi e Devle bariol o zivoto, a e bilachengo zivoto chikniol.

²⁸ E llene chache aduricharen e veselia, a e bilache aduricharen e zatrania.

²⁹ O Del arakhel golen kai cheren o lachipe, a zatril golen kai cheren o bilachipe.

³⁰ O lleno chacho nikada ni ka jasarel, a o bilacho lleno ni ka zivil pe phuv.

³¹ Katar o mui e chacheko likel o bizaipe a e bilacheki chib ka chinen la.

³² O lleno chacho del orbe sukar, a o lleno bilacho samo orbe bilache del.