Proverbios 1 - Biblia ande chib Romani

E alava bizai mol len but

¹ E orba katar o Salomon, chavo katar o David o charo katar o Israel,

² gala alava den amen: bizaipe ta sikaven amen, cheren amen te achara e alava chache,

³ sikaven amen, den amen bizaipe, chachipe, ortope, cheren te na pera,

⁴ bizarel e ternen kai ni llanen but, ta cherel len te llanen ta te mislinpe.

⁵ O lleno kai llanel ta si bizai, asunel len, ta gia lel mai but bizaipe ta sikol

⁶ te acharel so phenen e bizai, ta lenge alava, paramiche, ta e alava kai trubul te apogodi len.

⁷ Mai anglal te ave bizai trubul te blagosi e Devle, e dile ni kamen o bizaipe ta o sikadipe.

Sikadipe e ternenge

⁸ Chaurrea, asun che dade kana sikavel tut ta na muk o sikadipe che dadeko,

⁹ soke ka dikhol sukar pe tute: sargo iek sinlliri o iek korona.

¹⁰ Te mangena te kojaven tut e bilache, ¡na muk len, chaurrea!

¹¹ Soke sai phenen chuke: Aide amenchar, te istara varesave llene lache kai nakhel ta te mundara le.

¹² Te ja llunde e llenen lachen gia sar o meripe jal e llenen kai peren ando limori.

¹³ Ka avel amen but barvalipe, ¡ka phera amaro cher e ezgodenchar kai chordam!

¹⁴ Aide bre, chi baj si amenchar, te avel i chiro amaro barvalipe chidino.

¹⁵ ¡A phenav chuke chaurrea, te na lla lenchar! Duriu katar lenge bilache droma,

¹⁶ soke sigaren te cheren o bilachipe, ¡sigaren te mundaren vareka!

¹⁷ Soke samo gia thove iek kojaipe e chiriklienge te istare len, kana von sai dikhen le,

¹⁸ gola llene thoven o kojaipe isto von peke ta thoven po zivoto po meripe.

¹⁹ Gia si o son katar e llene jamllale, isto lengi jamllia mundarel len.

O bizaipe ikharel

²⁰ Pe droma ta ando foro o bizaipe urkil,

²¹ phenel pe alava pe udara, pe suako than kai chidiniaon e llene:

²² Terne, llene kai ni llanen, gola kai maren espurnia ta e dile, ¿gachin ios ka avel tumenge drago kai ni llanen, ta ka avel tumenge dragostia ande espurnia kai maren?

²³ Thoven sama so ka sikavav tumen ta me ka perav tumen katar mo duo, ka cherav te pinllaren me mislura

²⁴ Me diem tumen mui, ikhardem tumen te aven a tumen ni kamlen te thoven mange sama.

²⁵ Ni lien so sikavav tumen, ni kamen te ortou len.

²⁶ ¡I me ka asav pala tumare nuzde! ¡I me ka marav espurnia kana ka meren daratar,

²⁷ kana ka peren pe tumende e dar e nuzda ta e nevolia, sargo iek balav kai zatril sa!

²⁸ Gua llive ka ikharen man a me ni ka dav anglal, ka roden man, a ni ka malaven man,

²⁹ soke ni thoden sama po bizaipe ta ni kamen te blagosin e Devle.

³⁰ Nikamen te len mo sikadipe, ni thoven sama pe so sikavav tumen.

³¹ ¡Goleke ka avel tumenge pochindo prema so cherden! ¡Ka pherdon katar tumare nuzde!

³² Soke e llene kai ni llanen ka meren pala po billanglipe, ta e dile ka aven zatrime soke ni briginpe katar niso,

³³ a o lleno kai ka thovel mange sama, ka zivil ande pas ta ni ka daral katar niso.