Oseas 8 - Biblia ande chib Romani

O Israel dosalo soke pachal ande dela

¹ Basal chi tuturuga. Sargo iek agila avel te del pe foro katar o Israel, soke bangarde o alav kai achile manchar, ta ni kam le te len mo sikadipe.

² Ka ikharen man urkindo: ¡Devla, amen pinllara tut!

³ O Israel mukla o lachipe, goleke ka roden le leke dusmanura.

⁴ Von thode charura ta gazda kai me ni esvirisardem. Lie katar lengo rup ta lengo sunakai te sai cheren delen ta gia te zatrinpe isto von pe.

⁵ Cho telcho kai tu, Samaria, blagosi cherda tut te durio. Pherdilem jolinatar pe lende, gachin kai nasti chistonape.

⁶ Soke gava si katar o Israel. Fiko cherda le, inai e Devleko, goleke o telcho katar e Samaria ka achel pharrado pe kotora.

⁷ Soke thode balavia ta ka chiden bursin. Ni ka avel lenge septelie ta katar lengo lliu ni kam ikanen arina, a te si ka ikanen arina, e llene katar aver phuvia ka jan la.

⁸ ¡Ka jan e Israele! E aver phuvia ka dikhen le sargo iek lelleno kai ni mol niso,

⁹ soke von llele ande Asiria, sargo magarcho divo. ¡O Efrain pochinda te volin le!

¹⁰ Te pochinela e phuvienge, me ka rispiv len ta ande but vreme ni ka aven charura ta gazda.

¹¹ Soke o Efrain vazdel but altarura, kai samo blazin te cheren o bilachipe.

¹² Me pisisardem leke o baripe katar mo zakono, a vou dikhla len sargo iek ezgoda kai inai pinllardi.

¹³ Pe murne kurbanura die mas, ta jale. O Del ni manglale, akana ka delpe golli katar lengo bilachipe ta ka patil len pala so cherde, von ka irinpe ando Ejipto.

¹⁴ O Israel vazdel chera bare a bristarelpe katar lengo Del kai cherda le. O Juda vazdel forura zidome, a me ka cherav te phabon, ta sa lenge chera bare ka phabon.