Oseas 7 - Biblia ande chib Romani

¹ Kana mangava te sastarav me foro, dikhola o bilachipe katar o Efrain ta e Samaria. Soke kojavena sargo chorane dena ande chera, ta pe droma perena pe llenen.

² Ni acharen kai dav man golli katar sa lengo bilachipe. Akana truisarde len isto gola ezgode bilache kai ostade si angla ma.

O bilachipe katar e gazda

³ Po bilachipe ta po kojaipe mo foro veselil e charo ta e gazden.

⁴ Sa kojaven, von si sargo e furnava, kai kana phabaren la mukel te phurdel po iag kana e phalia si phukhili.

⁵ Ando llive kana thode e korona po charo, e gazda nasuarde le e moliaia. ¡Inzarda po va e llenenge kai marena espurnia!

⁶ Thode lengo lio sargo kana phabarena iek furnava. Sorro riat sovel o lleno kai phabarel la, a thiarinako rano e furnava ni mukla te avel phabardi.

⁷ Sa von si sargo e iag ande furnava, kai phabarda e krisarien. Sa e charura peletar, ni iek lendar ikharel man.

O foro kai durisailo katar leko Del

⁸ O Efrain amisailo avere foronenchar. O Efrain si sargo iek marrno chirado samo pe iek rig.

⁹ Llene katar aver phuvia jale leki zor, ta vou ni llanglale. Leke bal parrnile ta ni llanglale.

¹⁰ O istardipe katar o Israel ka del orba cheres le, ta ni irisaile karing o Del, ta ni rodie le.

¹¹ O Efrain saia sargo gulubo kai inai le bizaipe, ka mangel katar o Ejipto te pomozil le, ta i katar e Asiria ka mangel te pomozil le.

¹² Kana ka llan incha ka chudav pe lende murni mreza, ka cherav te peren ande la sargo e chiriklia, ka pativ len pala lengo bilachipe.

¹³ ¡Tesko lenge kai mukle man! e zatrania ka perel pe lende, soke ni kandie man. Me braduisardem len a von kojade man.

¹⁴ Makar urkina kana sea ande postelia, ni ikharde man pe oliea. Pala o lliu ta e mol, durisaile mandar.

¹⁵ Makar sikadem len ta cherdem zurale lenge va, von mislisaile o bilachipe mandar.

¹⁶ Irisaile, a na e Devleke, sea sargo arko bango, Pala o istardipe katar lenge chibia, mundarde e gazden e jarnienchar, ta ando Ejipto ka maren espurnia lendar.