Oseas 6 - Biblia ande chib Romani

O Israel del orba kai ka irilpe karing o Del

¹ Aven sa karing o Del. Vou pharrada ta vou ka sastarel amen. Vou ranisarda ta vou ka thovel iek chiti pe amaro rane.

² Kana ka nakhen dui llivesa ka del amen zivoto, ta ando trito llive ka cherel amen te usta katar o meripe.

³ Ta ka pinllara e Devle ta ni ka muka te pinllara le. Vou ka avel amenge sargo kana likel o kham, sargo kana delpeke pasa o viend ta pasa o milai.

So phenel o Del

⁴ Gia phenel o Del: ¿So ka cherav chuke Efrain? ¿So ka cherav chuke Juda? Tumaro volipe si sargo iek oblako thiarinako, sargo kana pechalpeke kana pharron e zore kai oma bilaon ta llantar.

⁵ Goleke ikandem tumen katar e poraukura, me alavenchar mundardem tumen. Che krisa si sargo villelo kai likel.

⁶ Soke me mangav zalva, a na kurbano te pinllaren man, ta na te den man kurbanura.

⁷ A von, sargo o Adan, ni gurude o alav kai achile manchar, ta ni kandie man.

⁸ O Galaad si iek foro bilacho, makhlo ando rat.

⁹ E popura si sargo koskarie kai aduricharen te peren pe iek lleno, mundaren ta cheren ezgode gado po drom kai llal ando Sikem.

¹⁰ Ando Israel dikhlem ezgode melale. O Efrain kurvisailo, ta o Israel meliardape.

¹¹ Ta i chuke, Juda lachardem iek llive kana ka chiden e simiche, kana ka cherav te irilpe mo foro katar o phandipe.