Oseas 5 - Biblia ande chib Romani

¹ Popura, asunen gava, foro katar o Israel thov sama, asunen tumen e llene katar e charoina: Tumen ka aven krisime soke sena sargo solo ando Mispa, ta sargo mreza po Tabor,

² sargo baro bunari ande bari umal katar o Sitim. Goleke ka pativ len.

³ Me pinllarav e Efraine, ta pinllarav e Israele. O Efrain kurvisailo, ta o Israel meliardape.

⁴ Ni kamen te irinpe karing o Del soke samo mislin ando kurvaluko, ta ni pinllaren e Devle.

⁵ O istardipe katar o Israel ka del pe leko mui. O Efrain eskombal isto po bilachipe, ¡ta ka eskombal lenchar sa o Juda!

⁶ Ka roden e Devle lenge bakrenchar ta lenge guruvenchar, ta ni ka malaven le soke vou mukla len.

⁷ Ni kandie e Devle soke si len chaurre katar aver dad. Pala lengo kojaipe, ando iek chon lengi phuv ka avel sa zatrime.

E duk katar o Israel ta o Juda

⁸ ¡Basen ando sing ando Gabaa ta ande tuturuga ando Rama! ¡Urkin daratar ando Bet aven! ¡Te izdral daratar o Benjamin!

⁹ O Efrain ka avel zatrime ando llive kana ka avel e duk. Me phenav le maskar e viche katar o Israel.

¹⁰ O Del phenel gia: E gazda katar o Juda si sargo e llene kai cheren mai bare e umalia, ka chudav pe lende murni joli sargo pai.

¹¹ Ustaven e Efraine dosaren le ande kris, soke mangla te radil e delenge.

¹² Me ka avav e Efraineke sargo papuruga kai jal le, ta sargo chermo e vichake katar o Juda.

¹³ Ta kana o Efrain ka dikhel po nasualipe ta o Juda po ranipe, ondaka o Efrain ka llal ande Asiria te mangel katar o charo o Jarel te sastarel le a o charo ni ka nasti sastarel le ta te sastarel o ranipe.

¹⁴ Soke me ka avav sargo liono e Efraineke gia ka dav po Efrain ta o Juda, isto me ka pharradav len, mapalal ka llautar ka inllarav len ta niko ni ka nasti braduil le.

¹⁵ Mapalal pale ka avav pe mo than lligo ni ka llanen lengo bilachipe ta ka roden man. ¡Ande lengi duk ka roden man!