Oseas 4 - Biblia ande chib Romani

O Del dosarel e Israele

¹ Asunen tumen israelitura so phenel o Del. Vou dosarel e llenen kai zivin ande gaia phuv, soke kate inai chachipe maskar e llene, sa kojaven ta ni pinllaren e Devle.

² So si mai but si e sovel bange, o kojaipe o mundaripe, o choripe, o kurvaluko, o silnope, ta ni achen te mundaren.

³ Goleke e phuv si zalosni, ta e llene kai zivin ande la ni ka avel lenge ios zor, ka meren e zivirinienchar dive ta e chiriklia, ta i e mache katar e mora ka meren.

O Del phukavel e poponen

⁴ Gia phenel o Del: ¡Niko te phukavel ta te del pe avere! soke cho foro si sargo kana ni kanden e poponen.

⁵ Tu ka pere ollivesea ta orachaia. Tuia ka perel o profeta, ta ka zatriv che da.

⁶ Me foro inai le llanglipe goleke zatrisarde le. Ta tu popo, kai ni manglan o llanglipe, ka lav tut katar o rado e poponengo, soke bristare tut katar o sikadipe e Devleko, i me ka bristarav man katar che chave.

⁷ E popura sea but, ta gia cherde but bilachipe angla ma, goleke ka boldav lengo baripe ando lallao.

⁸ Jan katar o bilachipe me foroko, goleke drago lenge kana mo foro cherel o bilachipe.

⁹ Ta o foro ka avel sargo e popura ka dukhavav len pala lengo bilachipe.

¹⁰ Soke mukle te radin e Devleke, ka jan ta ni ka chalion, ka cheren o kurvaluko ta ni ka aven lenge minone.

O Israel radil avere delenge

¹¹ O kurvaluko ta e mol cheren e manuseke te diliaol.

¹² Mo foro puchel e delen kastune, apogodil e kastenchar, ta pala o but kurvaluko mo foro llal pe droma bange, ta mukle e Devle ta sai kurvilpe.

¹³ Pe thana mai vazdine katar e burdura phabaren o taimano ta den kurbanura, ta i cheren le telal tala ensine, alamura ta olmura kai si len sukar senka. Goleke tumare chorra kurvinpe, ta tumare boria llan averea

¹⁴ A me ka pativ tumare chorren kana ka kurvinpe, ta tumare borien kana ka llan averea, soke i tumen llan kai e kurvichke ta llan e diskinienge kai kurvinpe e delenge. ¡Ta gia jasaol o foro soke inai le llanglipe ta ka avel peradino!

¹⁵ Te si kai tu Israel chere o kurvaluko, te na cherel le o Juda. ¡Na llan karing o Gilgal, na liken ando Bet aven, ta na jan sovel ando anav e Devleko!

¹⁶ O Israel ni kandel sargo iek telcha divi ta gia ¿ka arakhel len o Del pe thana zelene sukar, sargo bakrorren?

¹⁷ O Efrain samo llal kai e delen, muk le.

¹⁸ Leko pipe kandel. Ni muken te cheren o kurvaluko lenge si mai sukar te cheren ezgode lallaimake neko o liubao.

¹⁹ ¡Iek balav ka inllarel len ande leke pakha, ta ka jan lallao katar lenge kurbanura!