Oseas 3 - Biblia ande chib Romani

O Oseas ta e diskinia kai llal averea

¹ O Del pale phenda mange: Lla ta volisar iekhe diskinia, kai lako rrom volil la, ta voi llal averea. Gia o Del volil e chaven katar o Israel, makar von radin avere delen, ta drago lenge e marrne drakhake kai chiraven avere delenge.

² Ta chindem mange iek diskinia ta pochindem pala la desupanch tolaria rupune ta trin stotine litrura sebada.

³ Ta phendem lake: Tu ka ave but vreme murni, na cher o kurvaluko ta na lla avere murusea, ta i me ni ka kojavav tut.

⁴ Soke but vreme e chaven katar o Israel ni ka avel charo ni gazda, ni kurbano ta pechine kai blagosin, ni patave poponengo ta ni delen katar e familie.

⁵ Mapalal e chave katar o Israel ka irinpe, ka roden e Devle lengo Del, ta e Davide lengo charo. Ande llivesa mai palune ka llan liubaimaia karing o Del ta leko lachipe.