Oseas 2 - Biblia ande chib Romani

¹ Ondaka tumen ka phenen tumare phlalenge: Ami, ta tumare phiorrenge Rujama.

O kojaipe katar o Israel

² Gia phenel o Del: ¡Pukhaven tumare da, pukhaven la, soke voi inai ios murni rromi ta me ni sem ios lako rrom! ¡Te na sikadol ios sargo kurvichka! ¡Te lel pe kolina katar o kurvaluko!

³ Soke te na, me ka mukav la sa nangi, sargo kana biandili, ka cherav te avel iek pusto samo phuv suki ta ka cherav te merel trusatar.

⁴ Ni ka avel mange zao katar lake chave, soke von si chave katar o kurvaluko.

⁵ Soke lengi dei kurvisaili, achili ando lallao kana phenda: Ka llav kai murne murusa kai volin man, kai del man mo marrno ta mo pai, mo bal e bakreke ta mo chiti katar o lino, mo zeitino ta mo pipe.

⁶ Goleke, me ka phandav e karrnenchar lako drom, ta ka vazdav iek zido truial latar, te na malavel lake droma.

⁷ Ka llal pala lake murusa kai volin la, a ni ka resel len, ka rodel len ta ni ka malavel len. Ondaka ka phenel: Ka iriv man kai mo purvo rrom, soke lea llala mange mai sukar neko llal mange akana.

⁸ A voi ni pinllarda kai me sema o gua kai dela la o lliu, e mol ta o zeitino. Kai me sema o gua kai cherela te bariol o rup ta o sunakai kai dela len e Baaleke.

⁹ Goleke, ka avav pale ta ka lav mo lliu ta mi mol ando vreme kana chiden e simicha, ta ka lav e bal me bakreke ta mo chiti katar o lino, ka diem la te ucharel po nangipe.

¹⁰ Akana me ka sikavav lako dilipe angla e akha katar lake murusa kai volin la, ta niko ni ka braduil la katar mo va.

¹¹ Me ka cherav te na avel ios veseli, ta na aven ios lake slave ta lake mesechine, lake llivesa kai ni radin ande len, ta sa lake glamne llivesa.

¹² Ka chinav sa lake vostanura drakhake, ta sa lake kasta simochinenge, kai voi phenela lendar gia: Gava si o pochindipe kai die man me murusa kai volin man. Ka cherav len patra ta e zivirinie dive ka jan len.

¹³ Me ka pativ la pala sa o vreme kai voi phabarela o taimano e delenge, ta thovela pe pe chea ta klea ta llala kai lake murusa kai volina la ta bristarelape mandar. Me o Del phenav le.

O Del volil pe foro o Israel

¹⁴ A me ka cherav te volil man, ka inllarav la po pusto ta ka dav orba lake lieke.

¹⁵ Mapalal ka iriv lake vostanura drakhake, ta ka cherav katar e bari umal o Akor iek udar te aduricharel voi. Kote ka del orba manchar sargo kana saia terni, sargo kana likisti katar o Ejipto.

¹⁶ Ondaka ka ikharel man: Mo rrom, ta ni ka phenel mange: Mo Baal. Me o Del phenav le.

¹⁷ Soke ka lav katar lake us e anava katar e baalura, ta nikada ios ka ikharel len.

¹⁸ Gua vreme, pala tu ka achav po alav e zivirinienchar dive, e chiriklienchar ta e sapenchar. Ka phagav o arko, e jarni ta o maripe katar e phuv, te achel esmiro mo foro.

¹⁹ Ondaka tu ka ave mi rromi ostade, ka ziniv man tuia ando chachipe, e kris, ta e zalba, soke me voliv tut but.

²⁰ Me ka cherav tut murni rromi, ta ka avav tuia chacho, ta ka llane e Devle.

²¹ Ande gua vreme, phenel o Del, ka dav anglal e milosoke, o miloso ka del anglal e phuviake.

²² E phuv ka del anglal e lliueke, e moleke ta e zeitinoke, ta von ka den anglal e Jezreeleke.

²³ Ta thovav me foro ande phuv ka thovav le samo mange, ka avel mange zao katar o Lo rujama, ta ka ikharav e Lo amieke, Ami: Tu san mo foro, ta vou ka phenel mange: ¡Tu san mo Del!