Oseas 12 - Biblia ande chib Romani

¹ O Efrain jal balav, sorro llive llal pala o balav kai avel katar e rig kai likel o kham. Leko kojaipe ta silnope suako drom si mai but, achel po alav e asirionenchar, ta inllaren o zeitino ando Ejipto.

² O Del ka krisil e Israele. Ka dukhavel e foro katar o Jakob prema leke ezgode bilache kai cherel.

³ Omanglal te biandol, o Jakob cherdape kai saia po phlal, ta kana saia baro pe zoriaia dobisarda e suecho.

⁴ Mardape iekhe suechoia, ta dobisarda le. Rovda ta molisailo leke. O Del malada le ando Bet el, ta dia orba amenchar.

⁵ O Gazda, o Del kai si le sa e zor. ¡Jeova si leko anav!

⁶ Goleke Israel, irisao kai cho Del, cher ezgode lache ta chache ta suako drom thov chi vera ando Del.

⁷ O Kanaan si lleno kai chinel ta bichinel, ande po va si le pharipe kojamno, drago leke te kojavel.

⁸ O Efrain phenel gia: ¡Cherdilem barvalo, maladem mange barvalipe, niko nasti ka pukhavel man kai cherdem me love kojaimaia!

⁹ A me sem o Gazda, cho Del sar kana sana ando Ejipto. Ka cherav te zivi pale ande chare sargo kana sama ando pusto.

¹⁰ Diem orba e profetonenge ta cherdem te dikhen ios poroke sargo sune, ta diem orba lenchar paramichaia.

¹¹ Ando Galaad si delen delen kai inai len zivoto. Ando Gilgal den kurbanura guruven. Lenge altarura si samo umpa barreki maskar o putardipe kai si ande umalia.

¹² A o Jakob naslo ande phuv katar o Aram, ta kote te sai zinilpe, cherdilo chobano.

¹³ Ta katar iek profeta, o Del ikanda katar o Ejipto e Israele, ta katar iek profeta arakhla le.

¹⁴ O Efrain joliarda e Devle dia le bari joli, goleke o Del ka cherel te pochinen o mundaripe kai cherde, ta ka cherel te perel pe lende sa lengo bilachipe.