Oseas 10 - Biblia ande chib Romani

E zatrania katar e altarura e Israeleke

¹ O Israel si sargo kas drakhako pherdo drak, a kana sea ios septelie vazdela ios altarura, kana leki phuv saia mai sukar, mai sukar sea leke barra dine.

² Leko lio si fulado, akana ka avel dosalo. O Del ka zatril leke altarura, ka pharravel leke delen.

³ Akana gava foro ka phenel: Inai amen charo soke ni darailam e Devletar. ¿A so saia te cherel amenge iek charo?

⁴ Samo den orba gia, jan sovel bange ta achen po alav, lengo chachipe si sargo kas kai mundarel kai bariol maskar o putardipe e umaliako.

⁵ E llene katar e Samaria daran, roven soke jasailo o telcho katar o Bet aven. Si len bari zalba o foro ta e popura, soke jasaili leki dragostia.

⁶ Ka inllaren e telcho karing Asiria te den le e baro charoke. Gia o Efrain ka achel ando lallao, o Israel ka jal lallao pala leki orba.

⁷ Ka jasaol o charo katar e Samaria sargo o parrnipe kai si po pai.

⁸ E thana vazdine katar o Aven ka aven zatrime o bilachipe e Israeleko. E karrne ta e patra ka barion pe lenge altarura ta ka phenen e burdonenge: ¡Peren upral pe amende ta guruven amen!

O Del dosarel e Israele

⁹ O Israel ni mukel te cherel o bilachipe sar kana thodape te cherel le ando Gabaa ¡Ni durion katar o bilachipe! Goleke, o maripe ka resel gale llenen bilache.

¹⁰ Ka dukhavav gale foro kana me ka phenav le. Ka chidiniaon e phuvia te den pe lete kana ka dukhavav len pala lengo baro bilachipe.

¹¹ O Efrain si sargo telcha sikadi kai drago lake te ustavel o lliu. Akana thodem chinipe pe leki korr, te chidel e bordone, ta o Juda ka putarel e phuv o Jakob ka phagel e barra.

¹² Phendem lenge: Thoven e simicha katar o chachipe ta chiden e septelie katar o volipe. Lacharen e phuv te bariaren pale ios septelie, soke akana si o vreme te roden e Devle, lligo kana ka avel ta ka cherel te delpeke pe tumende o braduipe.

¹³ Tumen thoden e simicha katar o bilachipe, chidien so inai orta, ta jalen e septelie katar o kojaipe. Soke thodan chi vera ande bordona marimake ta ande che but boñikura.

¹⁴ Goleke ka avel burkania che foronenge ta sa che chera zurale ka aven zatrime, sargo o charo Salman zatrisarda e Bet arbele, ando llive marimako kana drobosarde e dea ta lake chaurren.

¹⁵ Gia ka avelpe tumenge llene katar o Betel, pala tumaro bilachipe. ¡O charo e Israeleko ka merel kana ka pharron e zore!