Numeros 9 - Biblia ande chib Romani

E slava katar e paskua

¹ Pala o burs llive katar likiste katar o Ejipto, ando purvo chon katar o burs, o Del dia orba e Moisesea po pusto katar o Sinai ta phenda leke:

² E israelita morabi cheren e slava katar e paskua ande po vreme,

³ o llive desustar katar gava chon pasa racha, prema sar si sikade ta prema o zakono te cherdol.

⁴ Ondaka o Moises phenda e israelenge te cheren e slava katar e paskua,

⁵ ta von cherde le gia o llive desustar katar gua chon, pasa racha, po pusto katar o Sinai, ta cherde le gia sar o Del phendaia e Moiseseke te cherel le.

⁶ A sea nesave llene kai sea pokalime soke dodisardea iekhe mule, goleke nasti cherde e slava katar e paskua gua llive. Gala llele te dikhen e Moisese ta e Aarone isto gua llive,

⁷ ta phende e Moiseseke: Amen dodisardam iekhe mule, goleke achilam pokalime. ¿A so ni ka muken amen te da ofrenda ando vreme kai trubulpe, maskar e israelenchar?

⁸ O Moises phenda lenge: Tumen aduricharen o Del te phenel mange so ka cherav tumenchar.

⁹ O Del dia orba e Moisesea ta phenda leke: Phen gala alava e israelenge:

¹⁰ Sa tumen ta tu maro porodo morabi te slavin e paskua ande mo liubao. E llene kai si pokalime soke dodisarde iekhe mule, o e llene kai si dur o kai laden,

¹¹ ka slavin la o llive desustar katar o duito chon, pasa racha. Morabi te jan o bakro e patrenchar cherke ta e marrnea kai ande lete ni thode levadura,

¹² ta ni ka muken niso katar o bakro kai dien kurbano thiarinake, ta ni ka phagen ni iek katar leke kokala. Ka slavin e paskua sar phenel o zakono katar e paskua.

¹³ A vareko, te avela chisto ta ni lagla ta ni slavila e paskua, gua lleno ka chinen leke te merel soke ni dia e ofrenda e Devle ando vreme kana saia te del, gua lleno ka inllarel po bilachipe.

¹⁴ E llene kai aven katar aver phuvia ta kai zivin maskar tumende morabi te slavin e paskua ande mo liubao gia sar phendem te cheren e slava gava zakono ka avel e llenenge kai aven katar aver phuv ta i golenge kai biandile ande phuv.

O oblako upral pe chara katar e alava

¹⁵ O llive kai vazdie o santuario o oblako ucharda le ta pasa racha sikadola upral po santuario sargo iek iag kai achela lligo ni llivosaola,

¹⁶ ta gia suako drom ollivesea o oblako ucharela o santuario ta orachaia ucharela le sargo iek iag.

¹⁷ Kana o oblako vazdiniaola katar e chara, e israelita ladena ta kote kai achela o oblako kote inzarena pe chare.

¹⁸ Kana o Del phenela, e israelita ladena o inzarena pe chare ta achena kote sa o vreme kai o oblako achela upral po santuario.

¹⁹ Kana o oblako achela but llivesa upral po santuario, ondaka e israelita kandena o alav e Devleko ta ni ladena.

²⁰ A o oblako te achela samo nesave llivesa upral po santuario ta kana o Del dela orba von inzarena pe chare, ta pale kana o Del dela orba von ladena.

²¹ Aver droma o oblako achela samo e riat, ta thiarinako vazdiniaola, ondaka von llanatar. Gua cherena te vazdiniaola o oblako orachaia o ollivesea von llanatar.

²² A te achela o oblako nesave llivesa o burs, sa so achela o oblako upral po santuario e israelita achena isto kote lenge chare, akana vazdiniaola o oblako ondaka von ladena.

²³ A kana o Del phenela lenge von lodena o ladena. Gia sar o Del phendaia e Moiseseke te cheren.