Numeros 8 - Biblia ande chib Romani

Sar te phabaren e lanpare

¹ O Del dia orba e Moisesea ta phenda leke:

² Phen e Aaronoke kai kana, ka phabarel e lampare e efta lampare ka kletosaren anglal katar o kandelero.

³ O Aaron kandia so o Del phendaia e Moiseseke ta phabarda e lampare katar o kandelero kai si anglal.

⁴ O kandelero saia cherdo katar o sunakai mardo e chokanoia, llik telal ta llik upre saia cherdo sargo lulunllin. Gia sar o Del sikadia iek kandelero e Moiseseke, gia cherda o kandelero.

Santifikin e levitaonen

⁵ O Del dia orba e Moisesea ta phenda leke:

⁶ Thou pe iek rig e levitaonen ta chistosar len.

⁷ Gia ka chere o zakono katar o chistope: Tu ka chude pe lende o pai katar o chistope, ta cher te nakhel o bursnako pe sa lengi esnaga ta ka jalaven pe patave, gia ka achen chiste.

⁸ Mapalal ka len iek telcho ta cherricha katar e mai lachi arina cherdi zeitinoia, te sai chere e ofrenda katar e septelia, ta i aver telcho kurbano pala o bilachipe.

⁹ Tu ka chere e levita te aven pasa e chara kai chidiniaon ta sa e israeleta te chidiniaon.

¹⁰ Ta kana ka chere e levita te aven pasa o Del, e israelita ka thoven pe va upral pe lengo soro.

¹¹ Ta o Aaron ka anel angla o Del e levitaonen sargo ofrenda katar e israelita ta ka radin ando rado e Devleko.

¹² Mapalal e levita ka thoven pe va upral pe sore katar e telchura iek ka den kurbano pala o bilachipe a ogua sargo ofrenda phabardi e Devleke, te sai chistonpe e levita.

¹³ Mapalal tu ka thove len angla o Aaron ta angla leke chaurre, ta ka delen ofrenda e Devleke.

¹⁴ Gia ka thove pe iek rig e levitaonen maskar ogola israelitura te sai aven murne.

¹⁵ Mapalal katar gala ezgode von ka llan te radin ande chara kai chidiniaon. Morabi te chisto len ta te ane len sargo iek ofrenda.

¹⁶ Soke, maskar e israelita, e levita ka aven dine mange, po than katar e purve biande, soke lien len mange po than katar e mai purane katar e chaurre katar sa o Israel.

¹⁷ Soke murno si o mai purano chaurro maskar e chaurre katar o Israel, ta isto gia katar e purve minone katar lenge zivirinie. De katar cherdem te meren e mai puranen chaurren katar e ejipsiura,

¹⁸ A me liem e levitaonen po than katar e mai purane e chaurre katar o Israel.

¹⁹ Ta diem len kai o Aaron ta kai leke chaurre, te sai ando anav katar e israelita, te radin ande chara kai chidiniaon ta te len o prostipe e Devleko e israelenge. Gia e israelita ni ka avel pe lende ni iek zatrania kana ka aven pasa o santuario.

²⁰ O Moises ta o Aaron ta sa o foro katar o Israel cherde so o Del phenda te cheren e levitaonenchar.

²¹ E levita chistosaile ta jalave pe patave ta o Aaron dia len ofrenda angla o Del, te sai chistonpe.

²² Mapalal katar gala ezgode e levita avile te cheren po rado ande chara kai chidiniaon, angla o Aaron ta leke chaurre. Isto gia sar o Del phendaia e Moiseseke te cheren cherde le e levitaonenchar.

O vreme katar o rado katar e levita

²³ O Del dia orba e Moisesea ta phenda leke:

²⁴ E levita morabi te thovenpe te radin kana ka avel lenge bis ta star burs,

²⁵ a kana ka avel lenge pinda burs nasti ka radin ios.

²⁶ Kana ka avel lenge gola burs sai ka pomozin pe phlalen ande chara kai chidiniaon te sai arakhen. A o rado kai saia len nasti ka cheren le ios. Gia ka chere e levitaonenchar pe lengo rado.