Numeros 4 - Biblia ande chib Romani

O rado katar e levita

¹ O Del dia orba e Moisesea ta e Aaronoia, ta phenda lenge:

² Cher iek llindipe katar e viche ta katar e familie katar e levitura ta katar familie katar o Koat katar lenge familie purane,

³ Katar e tranda burs llik kai e pinda ta kai sai radin ande chara kai chidiniaon.

⁴ Gava ka avel o rado katar e chaurre katar o Koat ando santuario kai chidiniaon, ando than santisimo:

⁵ Kana o pero ka ladel, o Aaron ta leke chaurre ka ikanen e kortina kai si kote katar delpe po than santisimo ta lea ka ucharen e arka katar e alava,

⁶ ta ka thoven upral e morcha katar e tejone ta upral pe morcha ka thoven iek chiti vuneto, ta ka thoven e pulsura te sai inllaren e arka.

⁷ Ta po stali kai thodon e marrne ka thoven upral iek chiti vuneto ta upral po chiti ka thoven vasura o platura bare, e rroia e tasura ta e tasura bare kai del e ofrende e moliake, ta o marrno kai del suako drom.

⁸ Ta upral katar sa gala ezgode ka thoven iek chiti lolo, ta ka thoven upral pe lete e morcha katar e tejones kai lenchar uchardon ogola ezgode, ta ka thoven e pulsura te sai inllardol.

⁹ Mapalal ka len iek chiti vuneto te ucharen o kandelabro kai kletosarel ta leke lanpare, ta sa leke ezgode kai thodol o zeitino.

¹⁰ Ta sa gala ezgode ka thovel len ande morcha katar e tejone ta ka thovel len pe upral pe iek kasta te sai inllaren len.

¹¹ Po altar sunakuno ka thoven iek chiti lolo ta ka thoven uprel pe lete e morchenchar katar e tejone ta ka thoven pe lete leke pulsura te sai inllaren le.

¹² Ta ka len sa ezgode katar o santuario ta ka thoven len ande iek chiti vuneto ta ka ucharen len e morchenchar katar e tejone ta ka inllaren len pe iek kasta.

¹³ Ka ikanen o prajo katar o altar ta ka thoven upral pe lete iek chiti vuneto.

¹⁴ Ta upral po chiti ka thoven sa gala ezgode kai radin lenchar po altar: E braserura, e beliuske e pale, e tasura bare, sa e ezgode katar o altar. Pe sa gala ezgode ka thoven upral pe lende e morcha katar e tejone ta e pusura te sai inllaren len.

¹⁵ Kana o Aaron ta leke chaurre ka ucharen sa e ezgode katar o santuario ta kana si te muchilpe o pero mapalal ka aven e chaurre katar o Keat te sai inllaren len, a nasti ka dodin niso katar e ezgode kai si sante, te na meren. Sa gala ezgode katar e chara kai chidiniaon si te inllaren e chaurre katar o Keat.

¹⁶ O Eleazar, chaurro katar o Aaron, ka inllarel o zeitino te sai kletosarel, o taimano kai khandel sukar, e ofrende kai denpe suako drom ta o zeitino kai santifikin ta ande leke va ka achel sa o santuario ta so si ande lete, o santuario ta sa leke ezgode.

¹⁷ O Del dia orba e Moisesea ta e Aaronoia ta phenda lenge:

¹⁸ Na muken e vicha katar e familia katar o Keat te merel maskar e levitura.

¹⁹ So morabi te cheren te sai zivin ta te na meren kana ka aven pasa o than santisimo, si gava: O Aaron ta leke chaurre si kai ka phenen lenge so morabi te cheren ta so morabi te inllarel suako lleno suako.

²⁰ Von ni ka den andre te dikhen kana ka ucharen e ezgode sante, te na chindol pe lenge te meren.

²¹ O Del dia orba e Moisesea ta phenda leke:

²² Cher iek llindipe katar e vicha ta e familia katar o porodo katar o Gerson

²³ Te aven katar e llene kai si lenge tranda o pinda burs kai sai radin ande chara kai chidiniaon.

²⁴ Gava ka avel o rado katar o porodo katar o Gerson:

²⁵ Von si kai ka inllaren e kortine katar o santuario, e chara kai chidiniaon, e morcha katar e tejone kai ucharen e kortina katar delpe andre katar e chara kai chidiniaon,

²⁶ e kortine katar e bar, e kortine katar delpe ande bar kai si truial katar o santuario ta o altar, e sole ta ezgode kai trubun po rado gava ka avel lengo rado.

²⁷ O Aaron ta leke chaurre si kai ka phenen so te cheren e chaurrenge katar o Gerson pe suako rado.

²⁸ Gava ka avel o rado katar e familie ta katar e chaurre katar o Gerson ande chara kai chidiniaon, ta von ka achen tala o va katar o itamar o chaurro katar o popo Aaron.

²⁹ Ka chere iek llindipe katar o porodo katar o Merari, prema lenge viche ta familie.

³⁰ Llin golen kai si lenge tranda llik kai e pinda burs kai sai radin ande chara kai chidiniaon.

³¹ Gava si o rado kai morabi te cheren ande chara kai chidiniaon, von ka inllaren e table katar o santuario, e pulsura, e pulsura thule ta e riga kai thodon.

³² E pulsura thule kai llan truial o santuario, pe rigenchar kai thodon, e chile ta e sole ta sa so trubul len te radin, tu morabi te phene suakone lleneke so morabi te inllarel.

³³ Gava ka avel o rado ande chara kai chidiniaon, gava rado ka cherel le e vicha ta porodo katar o Merari ta ko ka phenel so si cheren si o Itamar, chaurro katar o popo Aaron.

³⁴ O Moises ta o Aaron cherde o llindipe, prema e viche ta e familie katar o porodo katar o Keat

³⁵ kai saia lenge mai but katar tranda llik kai e pinda burs, kai sai radina ande chara kai chidiniaon,

³⁶ Ta e llene kai sea llinde sea dui milie ta efta stotine ta pinda.

³⁷ Gala sea e llene llinde katar e familia katar o Keat, kai radi ande chara kai chidiniaon. O Moises ta o Aaron sea kai llinde len, gia sar o Del phendaia e Moiseseke te cherel le.

³⁸ E llene kai sea llinde katar o porodo katar o Gerson prema lengi vicha ta familie e purane,

³⁹ kai saia lenge tranda llik kai e pinda burs kai sai radina ande chara kai chidiniaon,

⁴⁰ sea dui milie ta efta stotine ta tranda.

⁴¹ Gala sea e llene llinde katar e familia katar o Gerson kai sai radina ande chara kai chidiniaon, prema o llindipe kai cherde o Moises ta o Aaron soke o Del saia kai phenda lenge te cheren gava rado.

⁴² E llene llinde katar e vicha katar o Merari prema lengi familie purane,

⁴³ katar e tranda ta llik e pinda burs kai sai radina ande chara kai chidiniaon,

⁴⁴ sea trin milie ta dui stotine.

⁴⁵ Gala si e llene llinde katar e familia katar o Merari kai sai radina ande chara kai chidiniaon, prema o llindipe kai cherde o Moises ta o Aaron, gia sar o Del phendaia e Moiseseke te cherel.

⁴⁶ Sa e llene levita kai o Moises ta o Aaron ta e birovura katar o Israel kai llinde prema pe familie purane,

⁴⁷ katar e tranda burs llik kai e pinda burs ta kai sai radina ende chara kai chidiniaon,

⁴⁸ sea ojto milie ta panch stotine ta ojtovardes.

⁴⁹ Gia sar o Del phendaia e Moiseseke te cherel sea llinde, suako lleno prema po rado ta pe so saia thodo te radil.