Numeros 36 - Biblia ande chib Romani

So ka len e diskinie

¹ E birovura katar e familie katar e viche katar o Galaad chaurro katar o Makir, chaurro katar o Manases, katar e familie katar o Jose, llele angla o Moises ta angla e familie katar o Israel,

² ta phende: O Del phenda tu te fulave maskar e israelita e phuv prema sar perela suakone llene ta i phenda chuke e phuv kai saia te perel e Selofjade, kai saia katar amari familia saia te dela leke chorrenge.

³ A von te zininape e llenenchar kai si katar aver vicha katar o Israel, e phuv kai pela len ga avel katar e vicha katar e llene kai von zinisaile lenchar. Gia ka len amendar so pela amen katar e phuv.

⁴ Ta mapalal kana ka avel o burs kana mukliardon ando Israel e phuv lengi ka avel ogole vichaki ta ni ka avel ios e phuv katar amari vicha.

⁵ Ondaka o Moises gia sar phenda leke o Del te cherel phenda so te cheren e israelita: E llene katar e vicha katar o Jose so phende si o chachipe.

⁶ O Del ka mukel von te zininpe kaia von mangena samo te avena katar lengi vicha kai avel katar lengo dad.

⁷ E phuv kai suako lleno katar o Israel lia, nasti nakhel katar iek vicha kai aver. Suako israelita morabi te achel lete leki phuv ande piri vicha.

⁸ A varesavi diskinia kai si la phuv morabi te zinilpe iekhe llenea te avel isto katar piri vicha. Gia suako israelita ka achel lete e phuv kai lia katar pe dada.

⁹ Ta gia e phuv te na nakhel katar iek vicha kai aver. Suako vicha katar o Israel morabi te achel lende e phuv kai pela len.

¹⁰ Gia sar phenda o Del e Moiseseke gia cherde e chorra katar o Zelofjad.

¹¹ Goleke e Maala, e Tirsa, e Jogla, e Milka ta e Noa e chorra katar o Zelofjad, zinisaile e chaurrenchar katar pe kakura katar e rig pe dadeki

¹² kai avena katar e vicha katar o Manases, chaurro katar o Jose. Gia e phuv achili ande vicha kai saia lengo dad.

¹³ Gala si e alava ta e zakonura kai o Del dia e israelen kai dia kai o Moises ande umalia katar o Moab, pasa o Jordan angla o Jeriko.