Numeros 35 - Biblia ande chib Romani

E forura kai lie e Levita

¹ O Del dia orba e Moisesea ande umalia katar o Moab, pasa o Jordan, angla o Jeriko ta phenda leke:

² Phen e israelenge kai katar ephuv kai si telen, te den e levitaonen forura te sai zivin ta i te den len umalia pe zivirinienge kai si truial katar e forura.

³ E Levita ka zivin ande gola forura ta ande umalia ka avel lenge zivirinie.

⁴ E umalia kai si te den len morabi te aven truial o foro, star stotine ta pinda pole avri katar o zido e foroko.

⁵ Sa e bar ka avel la star riga kai ka avel len isto gola pole katar perel o kham katar o norte ta katar o sur. O foro ka achel po maskaral ta e umalia ka aven thruial.

⁶ Katar e forura kai ka den e levitonen sov forura ka aven forura kai te gurudon e llene kai mundarde vareka. Ta katar gala sov i ka den len ios saranda ta dui forura.

⁷ Sa e forura kai si te den e levitonen morabi te aven saranda ta ojto forura pe umalienchar e zivirnienge.

⁸ Kana ka den katar pi phuv e israelita e forura e levitonenge, von ka den prema so pela len: katar e phuv mai bari ka len mai but forura ta katar e phuv mai minoni ka len mai cherra.

E forura kai te gurudon

⁹ O Del dia orba e Moisesea ta phenda leke:

¹⁰ Phen e israelenge gala alava: Kana tumen ka nakhen o pai katar o Jordan ta ka den ando Kanaan,

¹¹ tumen morabi te ezbirin nesave forura te aven forura kai te gurudon e llene kai mundarde vareka a ni kamena te cherel le.

¹² Ande gola forura ka gurudol gua lleno kai mundarda te na mundaren le soke mai anglal morabi te avel angla o foro te sai krisin le.

¹³ Katar e forura dine sov ka aven te gurudon:

¹⁴ trin katar likel o kham katar o Jordan ta trin ando Kanaan.

¹⁵ Gala sov forura ka aven forura te gurudon, pegachin e israelenge ta i e llenenge kai aven katar aver phuvia kai zivin o kai nakhen maskar tumende. Kote sai ka gurudon sa e llene kai mundarde avere llene a ni kamena te cherel le.

¹⁶ Vareko te rrranila iekhe llene iekhe sastrea ta o lleno rranipe merela, gua si mundardipe ta o lleno kai mundarda morabi te chindol pe leke te avel mundardo.

¹⁷ A vareko te chalavela avere llene iekhe barrea kai sai mundarel ta o lleno chaladino merela, gua si iek mundardipe ta o lleno kai mundarda morabi te chindol pe leke te avel munbdardo.

¹⁸ A vareko te chalavela avere llene iekhe kastea kai sai mundarel ta o lleno chaladino merela, gua si iek mundardipe ta o lleno kai mundarda morabi te chindol pe leke te avel mundardo.

¹⁹ O lleno kai si mai familia katar o lleno kai mulo isto vou ka mundarel gole llene kai mundarda leke familia kana ka marakhel le.

²⁰ Vareko te espidela avere llene ande joli, o te chudela vareso ande lete bilachamaia,

²¹ O chalavela pe vastenchar jolinaia, ta o gua lleno merela, o lleno kai mundarda le ka chinen leke te avel mundardo soke mundarda. O lleno kai si mai familia katar o lleno kai mulo isto vou ka mundarel gole llene kai mundarda leke familia kana ka malavel le.

²² A vareko te espidela avere llene a vou ni kamela ta ni cherda le ande joli, a te chudela vareso ande iek lleno ta ni cherda le bilachimaia,

²³ o chudela iek barr ta ni dikhla kai chudia le ta gua barr sa mundarel ta te perela upral pe vareka ta te mundarela le a gua lleno kai mulo ni saia leko dusmano ta gua kai chudia o barr ni ka mela te mundarel le,

²⁴ ondaka o foro ka chinel e kris maskar o lleno kai mundarda ta o lleno kai si mai familia katar o leno kai mulo ta kai mangel te mundarel gole llene kai mundarda, ka chinen e kris prema gala zakonura.

²⁵ O foro morabi te arakhel e llene kai mundarda katar o lleno kai mangel te mundarel le soke si familia katar o lleno kai mulo ta o foro ka cherel te irilpe ando foro kai gurudon kote kai rodiaia te gurudol. Gua kai mundarda morabi te achel kote lligo ni ka merel o mai baro popo kai thode pe lete o Zeitino santo.

²⁶ A te likela katar o foro kai gurudon,

²⁷ ta o lleno kai si familia katar o lleno kai mulo malavela le avri katar o foro ta mundarela le ni ka dosaren le katar so cherda.

²⁸ O lleno kai mundarda morabi te achel ando foro kai gurudon lligo ni ka merel o mai baro popo ta mapalal sai ka irilpe ande po foro.

²⁹ Gala alava morabi te aven tumenge iek zakono oztade kaigo te zivina.

E zakonura katar e orba e chachi ta katar o reskate

³⁰ Samo katar e orba e chahi katar but llene sai ka chinen iekhe lleneke kai mundarda evere te merel. Samo iek lleno te del orba nasti pala iek lleno chinen nikake te merel.

³¹ Ni ka len love pala o zivoto katar iek lleno kai mundarda kai si chindo leke te merel. Gua lleno morabi te merel.

³² Nasti ka len love te sai muken iekhe llene kai mundarda kai rodia iek foro kai gurudon mai anglal te merel o mai baro popo.

³³ Na pokalin o e phuv kai ka zivin mundarrimaia, soke o mundaripe pokalil e phuv ta nasti ka jaladol e phuv lligo ni ka mundardol o lleno kai mundarda.

³⁴ Na pokalin e phuv kai ka zivin ta kai i me ka ziviu, soke me o Del ziviu maskar o Israel.