Numeros 32 - Biblia ande chib Romani

E vicha katar o Ruben ta o Gad besle ando Jordan katar likel o kham

¹ E chaurre katar o Ruben ta katar o Gad sea len but guruva ta bakre, goleke kana dikhle e phuv katar o Jaser ta katar o Galaad kai saia lachi te bariarena zivirinie,

² llele kai o Moises ta kai o Eleazar ta kai e birovura katar o foro ta phende lenge:

³ Dikhen e phuv katar o Atarot, o Dibon, o Jaser, o Nimra, o Jesbon, o Elale, o Seban o Nebo ta o Beon,

⁴ kai o Del dobisarda e foroke katar o Israel, si phuvia kai si char e zivirinienge, a so si amen tumare sluge si zivirinie

⁵ Te avela chuke drago de amen gola phuvia amen ta na cher amen te nakha o pai katar o Jordan.

⁶ A o Moises phenda llenenge: ¿Tumen mangen te achen kate so tumare phlal llan po maripe?

⁷ ¿Soke mangen te peraven e zor katar e israelita sar te na nakhen ande phuv kai o Del dia len?

⁸ Isto gua cherde tumare dada kana bichaldem len katar o Kades Barnea te sai dikhen goia phuv.

⁹ Avile llik kai pai katar o Eskol ta dikhle e phuv ta mapalal perade e zor katar e israelita sar te na den ande phuv kai o Del diaia len.

¹⁰ Goleke o Del gua llive jolailo ta jala sovel

¹¹ kai e llene kai likiste katar o Ejipto ta kai saia lenge bis burs upre ni ka dikhen e phuv kai sovlienchar jalema e Abrameke e Isaakeke ta e Jakobeke, soke ni sea chache angla ma.

¹² Samo o Kaleb chaurro katar o Jefone seneseo ta o Josue chaurro katar o Num, llele chachimaia pala o Del.

¹³ Ta o Del jolailo e israelenchar ta cherda len te llan po pusto saranda burs, lligo ni mula sa goia vicha kai cherdea o bilachipe angla o Del.

¹⁴ Ta akana i tumen mangen te cheren so cherde tumare dada ta pale te joliaol o Del e israelenchar.

¹⁵ A tumen te na mangena te llan pala o Del, vou ka cherel e israelen te achen ios vreme po pusto ta tumen ka aven e dosale katar e zatrania katar gava foro.

¹⁶ Ondaka von avile kai o Moises ta phende leke: So amen manga si kate te chera rindura amare Bakrenge ta amare guruvenge ta forura amare familiake.

¹⁷ Mapalal isto amen ka lachara amen te lla e marimake ta ka lla oma angla ogola israelita lligo ni ka inllara len kai lingi phuv ta so amen chera gava, amare familie ka achen ande forura gurudine katar e llene kai zivin ande gaia phuv.

¹⁸ Ta ni ka iri amen kai amare chera lligo ni israelita lena peke iek phuv.

¹⁹ Soke amen ni ka la phuv pe ogoia rig katar o Jordan ni mai incha.

²⁰ Ondaka o Moises phenda lenge: Te cherena le gia ta te lacharena tumen e marimake ta te llan angla o Del po maripe,

²¹ a sa tumen te nakhena o pai katar o Jordan lacharde e marimake angla o Del lligo ni trade la pe dusmanen angla pete,

²² ta lligo ni dobila sa e phuvien, ondaka tumen sai ka irin tumen kote ka achen bi dosake angla o Del ta angla o Israel. Ta gaia phuv ka avel tumari angla o Del.

²³ A te na cherena le gia, cheren iek bilachipe angla o Del ta pala gua bilachipe ka len duk.

²⁴ Vazden forura tumare familienge ta rindura tumare bakrenge ta e orba kai phenden kai ka cheren, cheren la.

²⁵ Ondaka o porodo katar o Gad ta katar o Ruben phende e Moiseseke: Che sluge ka cheren so tu phendan.

²⁶ Amare diskinie ta amare chaurre minone ta sa amare zivirinie, ka achen kate, ande forura katar o Galaad,

²⁷ ta amen che sluge, ka lachara amen te lla po maripe angla o Del gia sar tu phendan amenge te cherela le.

²⁸ Ondaka o Moises phenda gala ezgode te cherel o Eleazar, o Josue ta sa e birobura katar e viche katar o Israel:

²⁹ E chaurre katar o Gad ta e chaurre katar o Ruben nakhena o pai katar o Jordan, lacharde te marenpe angla o Del lligo ni tumen dobina e phuv, ondaka tumen ka den len e phuv katar o Galaad te avel lengo.

³⁰ A te na nakhena lacharde te marenpe, ondaka ka len iek phuv maskar tumende ande phuv katar o Kanaan.

³¹ E chaurre katar o Gad ta o Ruben phende: Ka chera so o Del phenda gale slugenge chire.

³² Ka nakha lacharde te mara amen angla o Del ande phuv katar o Kanaan ta amari phuv ka avel pe gaia rig katar o Jordan.

³³ Gia o Moises dia e chaurren katar o Gad, e chaurren katar o Ruben ta e dopas katar e vicha katar o Manases chaurro katar o Jose, e phuv katar o Sejon charo katar e amorreura ta e phuv katar o Og charo katar o Basan e phuv ta i lenge forura ta i e phuvia ta e forura kai si truial.

³⁴ E llene katar e vicha katar o Gad vazdie pale e forura katar o Dibon, o atarot, o Aroer, o Atarot Sofan, o Jaser, o Jogbeja,

³⁵ o Atarot Sofan, o Jaser, o Jogbeja,

³⁶ o Bet-nimra, ta o Bet Aran, ta zuriarde lenge zidura ta cherde rindura e bakrenge.

³⁷ E llene katar e vicha katar o Ruben vazdie pale e forura katar o Esbon, o Elale, o Kiriataim,

³⁸ o Nebo, o Baal Meon ta o Sibma, ta pharude nesave anava katar gola forura ta thode pire anava pe forura kai von pale vazdie.

³⁹ A e chaurre katar o Makir chaurro katar o Manases llele kai o Galaad ta lie la peke ta tradie amorreonen kai zivina kote.

⁴⁰ Ta o Moises dia kai o Makir e phuv katar o Galaad ta von zivisarde kote.

⁴¹ Ta i o Jair chaurro katar o Manases lia lenge forichura ta thoda lenge anava Javot Jair.

⁴² Isto gia o Noba llelo ta lia o foro katar o Kenat ta leke forichura ta ikharda len Noba prema po anav.