Numeros 31 - Biblia ande chib Romani

E zatrania katar o mdian

¹ O Del dia orba e Moisesea ta phenda leke:

² Cher te pochinen e madianitura so cherde e Israelenge ta mapalal katar gava ka mere.

³ Ondaka o Moises phenda e foroke: Nesave tumendar lachardon e marimake ta maren tumen e manusenchar katar o Madian te sai pochinen ando anav e Devleko.

⁴ Suako vicha katar o Israel morabi te bichalen milia llenen te marenpe.

⁵ Gia si sar ezbirisarde katar suako vicha katar o Israel milia llenen kai cherdile desudui milie llene lacharde te marenpe.

⁶ O Moises bichalda len po maripe ta llelo lenchar o finees, chaurro katar o popo Eleazar kai inllarela e ezgode sante ta e tuturuge kai basena kana von kan von llana te marenpe.

⁷ Ta mardepe e manusenchar katar o Madian ta mundarde saurren, gia sar o Del phendaia e Moiseseke te cherel.

⁸ Ta maskar e llene kai mundarde sea e charura katar o Madian, o Evi, o Rekem, o Zur, o Jur ta o Reba, e panch charura katar o Madian. A o Balaam chaurro katar o Beor i le mundarde.

⁹ E israelita inllarde phangle e diskinien e madianenge ta i lie lenge minonen ta lie lendar lenge zivirinie ta sa so saia len,

¹⁰ Ta i phabarde sa lenge forura ta forichura kai zivina,

¹¹ ta sa so saia len manusa ta i zivirinie.

¹² Ta sa gola ezgode kai ande, ande len kai o Moises, kai o Eleazar ta kai o foro katar o Israel kai lengo pero saia kai e umal katar o Moab, pasa o Jordan, angla o Jeriko.

¹³ O Moises o popo Eleazar ta sa e birovura katar o foro llele te lel len avri katar o pero.

¹⁴ A o Moises jolailo e birovenchar kai gazdarina pe milia ta pe stotina bonllikura kai avena katar o maripe,

¹⁵ ta phenda lenge: ¿Soke muklen llunde sa gale diskinien?

¹⁶ Soke pala e dos katar o Balaam, kana von thodele sama so phenda lenge cherde e israelita te vazdiniaon po Del ta cherde te blagosin e devle kai ikhardo Baal Peor. Goleke but mule maskar o foro e Devleko.

¹⁷ Mundaren akana sa e minonen kai si murus ta sa e diskinien kai inai chea.

¹⁸ E chorren kai si chea muken len te zivin.

¹⁹ Ta sa gola llene kai mundarde vareka o dodisarde varesave esnage mule, morabi te achen avri katar o pero efta llive. Gia tumen sar e llenen kai phanglen morabi te chiston tumen o trito llive ta o eftato llive.

²⁰ Morabi te chiston i e patave ta sa e ezgode cherde katar e morchi, o katar e bal katar e busnia o te avena kastune.

²¹ O popo Eleazar phenda sa e monitonenge kai sea po maripe: Gava si iek zakono kai o Del dia e Moisese:

²² E ezgode cherde katar o sunakai, katar o rup katar o tuch katar o sastri katar o archichi katar o molivi

²³ ande iek alav sa so ni phabol iagaia, morabi te chiston len ande iag ta te jalaven len e paiea katar o chistope. E ezgode kai phabon e iagaia morabi te chistonpe samo paiea.

²⁴ O llive eftato morabi te jalaven pe patave ta ka achen chiste. Mapalal sai ka den ando pero.

Fulaven so lie kana mardepe

²⁵ O del dia orba e Moisesea ta phenda leke:

²⁶ Tu ta o popo Eleazar ta e borovura katar e familie katar o foro, llin e llenen ta e zivirinie kai lien katar e madianitas,

²⁷ fulav len pe dui isura ta de iek isi golen kai llele te marenpe a o gua isi maskar sa o foro.

²⁸ Ta i ka chide so ka avel dino e Devleke katar pherel e boñikonen ta i sa e sueto katar e guruva, katar e magarcha ta e bakre, ka le iek katar e panch stotine

²⁹ ta ka de le kai o popo Eleazar sargo ofrenda e Devleke.

³⁰ Ta katar o dopas kai si katar e israelita, i katar e llene ta katar e guruva magarchura ta bakre katar sa e zivirinie ka le iek katar e pinda ta ka delen kai e levita kai radin ando santuario.

³¹ O Moises ta o Aaron cherde gia sar o Del phendaia e Moiseseke te cherel.

³² Sa so lie katar pe dusmanura bi te llindol so e boñikura chidie von petar, sea sov stotine ta eftavardes ta panch milie bakre

³³ eftavardes ta dui milie guruva

³⁴ sovardes ta iek milia magarchura

³⁵ ta tranda ta dui milie chea.

³⁶ Goleke, o dopas kai pela e boñikonen sea trin stotine ta tranda ta efta milie ta panch stotine bakre

³⁷ kai lendar diepe sov stotine ta eftavardes ta panch ofrenda e Devleke.

³⁸ Katar e tranda ta sov milie guruva diepe sovardes ta dui ofrenda e Devleke.

³⁹ Katar e tranda milie ta panch stotine magarchura diepe sovardes ta iek ofrenda e Devleke.

⁴⁰ Ta katar e desusov milie chea diepe tranda ta dui ofrenda e Devleke.

⁴¹ O Moises dia e ofrenda e Devleki kai o popo Eleazar, gia sar o Del phendaia e Moiseseke te cherel.

⁴² A o gua dopas katar o isi kai perela e israelen ta kai o Moises thoda pe iek rig katar so perela e llenen kai llelea te marenpe,

⁴³ saia isto trin stotine ta tranda ta efta milie ta panch stotine bakre,

⁴⁴ tranda ta sov milie guruva,

⁴⁵ tranda ta panch milie ta panch stotine magarchura,

⁴⁶ ta desusov milie llene.

⁴⁷ Katar gava dopas isi ikanda iek katar e pinda, ta i katar e manusa ta i katar e zivirinie ta dia len kai e levita kai radina ando santuario e Devleko, gia sar o Del phendaia e Moiseseke te cherel.

⁴⁸ Ondaka e birovura kai tala lengo va sea milia o stotina monllikura llele te dikhen e Moisese

⁴⁹ ta phende leke: Amen che sluga, llindam e mollikura kai sea tala amaro va ta saurre si kate.

⁵⁰ Etalen kate e ezgode sunakune kai suako lleno malada: slave, angrusta, chea ta aver ezgode te da len e Devleke te sai la a maro prostipe.

⁵¹ O Moises ta o Eleazar lie lendar sa e ezgode sunakune

⁵² kai die ofrenda e birovura kai tala lengo va sea milia o stotina monllikura, gala ezgode phariade mai but katar e stotina ta ojtovardes ta star kile,

⁵³ soke suako boñiko anda vareso katar so liea katar pe dusmanura.

⁵⁴ Gia si sar o Moises ta o Eleazar lie katar e birovura o sunakai kai andea ta inllarde le kai e chara kai chidiniaon te sai o Del delpe golli katar e israelita.