Numeros 28 - Biblia ande chib Romani

E ofrende sauko llive

¹ O Del dia orba e Moisesea ta phenda leke:

² Phen e israelenge te na bristardon te anen mange ando vreme marrno ta ofrende phabarde kai khanden sukar mange ande slave bare.

³ Ta phen lenge kai gala ofrende phabarde morabi te cheren len suako llive ande mo liubao dui bakre iekhe burseke te na aven nasuale.

⁴ Iek ka delpe kurbano thiarinako rano a ogua pasa racha.

⁵ E ofrende katar septelie ka aven dui kile katar e mai lachi arina cherdi iekhe litroia zeitino katar e maslinka.

⁶ Gaia saia e ofrenda phabardi kai dena suako llive kai o burdo katar o Sinai, sargo ofrenda phabardi kai khandel sukar e Devleke.

⁷ E ofrenda katar e mol ka avel iek litro pe suako bakro. Gaia mol morabi te chordol ando santuario, ando liubao e Devleko.

⁸ O duito bakro ka den le kurbano pasa racha ta ka den gale bakrea iek ofrenda katar e septelie ta iek ofrenda moliaki sargo e ofrenda kai die thiarinako rano. Gaia si iek ofrenda phabardi kai kandel sukar e Devleke.

E ofrende katar o sabado

⁹ Ande sabadura tumen morabi te den dui bakre iekhe bursenge, te na aven nasuale ta star kile katar e mai lachi arina cherdi zeitinoia sargo ofrenda katar e septelie, pe ofrendaia pimaki.

¹⁰ Gava si o kurbano phabardo suakone sabadoke, pe ofrendaia moliaki ta i o kurbano kai delpe suako llive.

E ofrende katar suako chon

¹¹ O purvo llive katar suako chon ka den kurbano e Devle dui telchura iek busno ta efta bakre iekhe burseke te na aven nasuale.

¹² Pe suako telcho ka den sov kile katar e mai lachi arina cherdi zeitinoia. Pe suako busno, star kile arina cherdi zeitinoia,

¹³ ta pe suako bakro, dui kile arina cherdi zeitinoia. Gava si iek kurbano phabardo kai khandel sukar e Devleke.

¹⁴ E ofrenda katar e mol ka avel duie litroia pe suako telcho iek litro ta dopas pe suako busno, ta iek litro pe suako bakro. Gava si o kurbano phabardo kai morabi te den suako chon pe sa e chona e burseke.

¹⁵ Ta katar o kurbano phabardo kai del pe suako llive morabi te den i iek busno kurbano pala o bilachipe, e ofrendaia pimaki.

E ofrende ande paskua

¹⁶ O llive desustar katar purvo chon katar o burs ka cheren e slava katar e paskua ando liubao e Devleko,

¹⁷ ta o llive desupanch ka avel o llive katar e slava. Ande efta llive ka jan o marrno kai ande lete inai levadura.

¹⁸ Ando purvo llive katar gola llivesa ka avel iek santo chidinipe. Ande gua llive tumen ni ka cheren ni iek rado.

¹⁹ Ta o kurbano phabardo kai ka den e Devle ka avel dui telchura, iek busno ta efta bakre iekhe burseke te na aven nasuale.

²⁰ Gale kurbanenchar ka den i iek ofrenda katar e arina cherdi e zeitinoia gia ka cheren le: sov kile arina pe suako telcho star kile arina pe suako busno

²¹ ta dui kile pe suako bakro.

²² Ta i ka den iek busno kurbano te sai len o prostipe katar tumaro bilachipe.

²³ Sa gava ka den le ta i o kurbano phabardo kai deolpe suako llive thiarinako rano.

²⁴ Gia ka cheren le pe suako llive katar e slava, sargo ofrenda phabardi kai khandel sukar e Devleke. Gava morabi te delpe e ofrendaia e moliaki.

²⁵ O eftato llive ka avel tumen iek santo chidinipe. Ande gua llive ni ka cheren ni iek rado.

E o frenda katar e purve septelie

²⁶ Ande slava katar e purve septelie, kana den e septelie katar iek nevo chidinipe katar so del e phuv, ande slava tumare llivesenge, ka avel tumen iek santo chidinipe. Ande gua llive ni ka cheren ni iek rado.

²⁷ Ka den kurbano phabardo kai khandel sukar e devleke, dui telchura, iek busno ta efta bakre iekhe burseke.

²⁸ Ta e ofrenda katar e arina cherdi zeitinoia ka avel sove kilenge pe suako telcho ta star kile po busno

²⁹ ta dui kile pe suako bakro.

³⁰ Ta i kaden iek busno kurbano te sai len o prostipe katar po bilachipe.

³¹ Gava kurbano phabardo ta leke o frende katar e septelie ta e moiliake ka den le.