Numeros 24 - Biblia ande chib Romani

¹ A sar o Baalam dikhla kai e Devleke avila leke drago te blagosil e Israele, vou ni llelo te lel e profesia katar o Del gia sar cherdaia le ogola droma ta dikhla po pusto.

² Ta kana dikhla o Balaam e israele ta lenke chare inzarde, o duo e Devleko gazdarisarda pe lete.

³ Ondaka o Balaam phenda gaia profesia: Poroka katar o Balaam chaurro katar o Beor, o manus kai leke akha si putarde.

⁴ Phenda gua kai asunda e alava e Devleke gua kai sikadila leke o Del o baro peradino a e akhenchar putarde.

⁵ ¡Jakob, gia sukar si che chare! ¡Gia sukar si Israel cho pero!

⁶ dikhon sargo palmere, sargo vostanura pasa o pai, sargo aloes thode ande phuv e Devletar, ¡sargo sedros pasa o pai!

⁷ O Israel ka avel le but pai te pien ta te thoven pe pe vostanura. Lengo charo ka gazdaril pe sa o Agag. Leki zor ka avel but bari.

⁸ O Del ikanda len katar o Ejipto. Si le e zor katar o bufalo. O Israel ka zatril e phuvien kai si leke dusmanura. Ka phagel lenge kokala, ta ka rranil len pe llidenchar.

⁹ Kana thovelpe tele sargo iek liono, niko ni tromal te llungavel le. ¡Blagosime te avel ko blagosil tut ta proketo ko dela tut armaia!

E poroka katar o Balaam

¹⁰ Kana asunda gala orbe, o Balak but jolailo e Balaameea ta marda pe vastenchar ta phenda: Me ikhardem tut te de armaia me dusmanen a tu blagosisardan len trin droma.

¹¹ ¡Akana nas kai cho cher! me diem tut mo alav kai ka dav tut baro liubao. A o Del ni mukla tut te avel tut gaia ezgoda.

¹² A o Balaam phenda leke: Me phendem e llenenge kai bichaldan.

¹³ Kai i te dena man sa o sunakai ta o rup kai resen ande cho cher, me samo sai phenav so o Del phenel mange te phenav ta nasti cherav o lachi ni o bilachipe pala mi volia, ta kai samo ka phenav so o Del phenela mange te phenav.

¹⁴ Sar dikhen akana me llautar kai mo foro, a mai anglal te llautar me ka phenav chuke so ka cherel mai angle gava foro che foroia.

¹⁵ Ondaka o Balaam phenda gaia profesia: E poroka katar o Balaam, chaurro katar o Beor, o manus katar e akha putarde.

¹⁶ Gua kai asunel e Devleke alava ta kai llanel o bizaipe e Devleko, gua kai dikhel so sikavel leke o Del o baro. Peradino e leke akha putarde:

¹⁷ dikhav vareso ando vreme mai angle dikhav le dur: voi si iek cherain kai likel katar o Jakob, iek charo ka vazdiniaol ando Israel. Ka rranil o soro katar o Moab, ta ka zatril sa e chaurren katar o Set.

¹⁸ Ka dobil e phuv katar o Edom, ta i o Seir kai si leko dusmano. O Israel ka cherel bare ezgode.

¹⁹ Katar o Jakob ka likel iek kai ka gazdaril ta ka zatril so achela katar o foro.

²⁰ Mapalal dikla karing o foro o Amalek ta phenda gaia profesia: Amalek si e phuv glamni, a ka avel sa zatrime.

²¹ Ta i dikhla karing e kenitura ta phenda gaia profesia: Porodo katar o Kain: i te avena zurale tumare chera, thov cho kuibo ande pechina.

²² Soke e kenitura ka aven tradine kana e Asiriura ka inllaren tumen phangle.

²³ Mapalal phenda gaia profesia: ¡Ioi! ¿Ko ka zivil kana o Del ka cherel gala ezgode?

²⁴ Aven llimie bare katar e more katar o Chipre ta ka muken zatrime e phuv katar e Siria ta i e phuv katar o Eber, soke i o Eber, ka avel zatrime.

²⁵ Ondaka o Balaam llelotar kai po cher ta i o Balak llelotar pe po drom.