Numeros 23 - Biblia ande chib Romani

¹ Ondaka o Balaam phenda leke: Cher kate efta altare ta lachar mange efta telchura ta efta busne.

² Ta o Balak cherda so phenda leke o Balaam ta maskar e dui mundarde iekhe telcho ta iekhe busne pe suako altar.

³ Mapalal o Balak phenda e Balakeeke: Tu thov tut pasa cho kurbano, so me llav te dikhav o o Del ka avel te maladol manchar. Mapalal me ka phenav chuke so vou ka sikavel mange.

O Balaam blagosil e israeleke

⁴ Ta o Del avilo te maladol lea. A o Balaam phenda leke: Lachardem efta altare ta pe suako iek diem iek telcho ta iek busno.

⁵ Ondaka o Del thoda ando mui katar o Balaam so te phenel ta phenda leke: Irisao kote kai si o Balak ta phen leke so me phendem chuke.

⁶ Ta o Balaam irisailo kote kai sea e altare ta kote saia o Balak pasa o kurbano, sa e birovenchar katar e Moabite.

⁷ Ondaka o Balaam phenda gaia profesia katar so si te avelpe: Katar e burdura katar o oreinte, katar o Aram, cherda man te avav o Balak, charo katar o Moab. Aide phenda mange, de armaia e israele, Kubisar o bilachipe e foroke katar o Jakob.

⁸ A sar, ¿ka dav armaia gole kai o Del ni dia armaia? ¿Sar ka kubiu o bilachipe kana o Del ni cherel le?

⁹ Katar gala bare barra sai dikav le, katar gala burdura dikhav le: a iek foro kai zivil pe iek rig, kai inai sargo ogola forura.

¹⁰ Von si sargo o prajo, ¿ko sai llinel len? ¿Ko sai llanel pegachin si von? ¡Daboida te merav me sargo gola llene chache, ta mo son te avel sargo lengo!

¹¹ Ondaka o Balak phenda e Balameeke: ¿So chere me andem tut te de armaia me dusmanen, a tu blagosi len?.

¹² O Balaam phenda leke: Ni achilama kai me ka phenav samo so o Del thovela ande mo mui te phenav.

¹³ A o Balak phenda: Moliman chuke aide manchar pe aver rig, de sai dikhe samo truial katar lengo pero ana sa o pero. Ta kotar delen armaia.

¹⁴ Ta o Balak inllarda e Balaamee ande umal katar o Sofin, chak upre katar o burdo kai ikhardol Pisga ta kote cherda efta altare ta pe suako altar dia kurbano iek telcho ta iek busno.

¹⁵ Kote o Balaam phenda e Balakeeke: Tu achi kate so me llav te maladivav e Devlea.

¹⁶ Ta o Del maladilo e Balaameea ta thoda ande leko mui so saia te phenel ta i phenda leke: Irisao kote kai si o Balak ta phen leke so me phendem chuke.

¹⁷ O Balaam irisailo ta malada e balakee pe porrne, pasa o kurbano e birovenchar katar e moabite. Ta o Balak phenda leke: ¿So phenda chuke o Del:?

¹⁸ Ondaka o Balaam phenda gaia profesia: Balak, chaurro katar o Sipor, thov sama ta asun.

¹⁹ O Del i nai sargo e manusa: Vou ni kojavel ta ni pharruvel po mislo. Kana phenel iek ezgoda, cherel la. Kana del po alav cherel le.

²⁰ O Del phenda mange te blagosiv, o Del te blagosil me nasti phenav leke te na cherel le.

²¹ O Del ni dikhla o bilachipe ando Jakob, ta ni dikhla o kojaipe ando Israel. O Del lengo Gazda si lenchar, ta veselia charoki si ande lete.

²² O Del ikanda len katar o Ejipto. E zoriaia katar o bufalo.

²³ E chirimate ni resen po Jakob, ta ni blazin e chirimate po Israel. Akana morabi te phena e israeleke: ¡Pe gachin ezgode bare cherda o Del tuia!

²⁴ Gava foro vazdiniaol sargo liono, ta ni ka achel lligo ni ka zatril pe dusmano, ta te jal lengo rat golengo kai mundarda.

²⁵ Ondaka o Balak phenda e Balaameeke: ¡Akana sar tu nasti de armaia gale foro na blagosile!

²⁶ A o Balaam phende leke: ¿Ni phendema me chuke kai samo sai cherav so o Del phenela mange te cherav?

²⁷ Ondaka o Balak phenda leke: Aide ka inllarav tut pe aver rig. Sai avelpe kai o Del ni ka joliaol tu te de aramaia kotar.

²⁸ Gia o Balak inllarda e Balaamee llik upre po burdo kai ikhardol Peor, kotar katar dikhol sa o pusto.

²⁹ Kote o Balaam phenda e Balaameke: Cher mange kate efta altare ta lachar mange efta telchura ta efta busne.

³⁰ Ondaka o Balak cherda gia sar o Balaam phendaia leke te cherel. Ta dia iek telcho ta iek busno pe suako altar.