Numeros 22 - Biblia ande chib Romani

O Balak ta o Balaam

¹ E israelita lleletar kotar ta inzarde pe chare ande umalia katar o Moab pasa o Jordan, angla o Jeriko.

² O Balak, chaurro katar o Sipor, dikhla so cherdea e israelita e amorreonenchar.

³ Ta o Moab but darailo cheres o foro soke sea but ta o Moab but brigisailo cheres e israelita.

⁴ Ta o Moab phenda e phurenge katar o Madian: Sa gala llene ka zatrin amari phuv, sargo iek guruv kai zatril e char katar e umal. Ande gua vreme o Balak saia charo katar o Moab,

⁵ goleke bichalda llenen kai o Balaam chaurro katar o Beor, te ikharenle vou saia ando Petor, pasa o pai kai ikhardol Eufrates, ande phuv katar o Amav. O Balak bichalda gaia porrouka pala gola llene: Katar o Ejipto avilo iek foro kai barilo ande sa gaia phuv ta akana zivin angla ma.

⁶ Aide oma ta de armaia gale foro, soke si mai zuralo neko amen soke gia me sai ka dobiu len ta sai ka tradav len katar e phuv. Soke me llanav kai cho blagosipe ta che armaia suako drom cherdon.

⁷ E phure katar o Moab ta katar o Madian llele e lovenchar ando va te sai pochinen e armaia ta kana avile kote kai saia o Balaam phende leke e poroka katar o Balak.

⁸ A o Balaam phenda lenge: Achen kate gaia riat ta me ka phenav tumenge prema so o Del phenela mange. Ta e phure katar o Moab achile lea.

⁹ A o Del sikadilo kai o Balaam ta pusla le: ¿Ko si gola llene kai si tuia?

¹⁰ O Balaam phenda leke: O Balak, chaurro katar o Sipor, kai si o charo katar o Moab, bichalda len te phenen mange.

¹¹ Kai iek foro likisto katar o Ejipto ta kai barilo ande sa e phuv. O Balak mangel me te llav isto akana te dav len armaia, gia te sai dikhel te dobil len ta te tradel len katar pi phuv.

¹² Ondaka o Del phenda e Balaammeke: Na lla lenchar ta na de armaia gole foro, soke gole foro me blagosisardem le.

¹³ Thiarinako o Balaam ustilo ta phenda e birovenge kai bichaldaia o Balak: Irin tumen kai tumari phuv. O Del ni mukel man te llav tumenchar.

¹⁴ E birovora katar o Moab irisaile kote kai saia o Balak ta phende leke: O Balaam ni kamla te avel amenchar.

¹⁵ A o balak pale bichalda mai but birovonen ta mai glamne neko ogola.

¹⁶ Von llele kai o Balaam ta phende leke: O Balak chaurro katar o Sipor bichalda te phena chuke: Moliman chuke na phen kai nasti aide.

¹⁷ Me ka dav tut e mai bari pachiu ta ka cherav sogo tu mangea mandar, goleke aide akana ta cher mange gava sebapi te de armaia gale foro.

¹⁸ A o Balam phenda leke: I te dela man o Balam sa o sunakai ta o rup kai resen ande leko cher, me nasti bangarav me Devleke alava te cherav iek ezgoda minoni o bari.

¹⁹ A tumen achen i gaia riat ta ka dikav so ka phenel mange akana o Del.

²⁰ Orachaia o Del sikadilo kai o Balaam ta phenda leke: Te avile gala llene te ikharen tut uste ta la lenchar. A ka chere so me ka phenav chuke.

O Balaam ta o suecho e Devleko

²¹ O Balaam ustilo thiarinako, lacharda po magarcho ta llelotar e birovenchar moabite.

²² O Balaam llala pe pi magarcha ta llana lea dui sluge leke. A o Del jolailo lea soke lleloatar ta o suecho e Devleko thodape pe leko drom te sai phandel leko drom.

²³ Kana e magarcha dikhla kai o suecho e Devleko saia po maskaral katar o drom iekhe jarniea ando, valikisti katar o drom ta llelitar katar e umal, a o Balaam chalada la te sai cherel la te irilpe po drom.

²⁴ Ondaka o suecho e Devleko thodape pe iek rig katar o drom kai si tang kai nakhela katar e drakha ta pe dui riga katar o dron sea zidura barrenge.

²⁵ Kana e magarcha dikhla o suecho e Devleko, inzili pe iek katar e zidura ta chichidia o porrno katar o Balaam. Ondaka o Balaam pale chalada la.

²⁶ Ondaka o suecho e Devleko llelo mai anglal lendar ta achilo pe iek rig tang kai nasti llana pe ni iek rig.

²⁷ Kana e magarcha dikhla o Suecho e Devleko thodape tele. Ondaka o Balaam jolailo laia ta chalada la iekhe kastea.

²⁸ Ondaka o Del cherda e magarcha te del orba ta phenda e Balaameeke: ¿So cherdem chuke? Gale dromaia ia si trin droma kai chalave man.

²⁹ A o Balaam phenda: A so mare espurnia mandar, te avela ande me va iek churi isto akana mundardema tut.

³⁰ A e magarcha phenda leke: Me sem e magarcha kai sa cho zivoto llelan pe late ta tu llane kai nikada ni cherdem gia tuia. A o Balaam phenda: Ea o chachipe.

³¹ Ondaka o Del cherda o Balaam te dikhel pe suecho, kai saia po maskaral katar o drom iekhe jarniea ando va. O Balaam dia changa lligo ni dodisarda e phuv pe chikatea,

³² a o suecho e Devleko phenda leke: ¿Soke chaladan trin droma che magarcha? Me sem kai avilem te phandav chuke o drom soke so chere inai mange drago.

³³ E magarcha dikhla man ta trin droma durili mandar. Te na durilia mandar, me mundardema tut a la muklema la te zivil.

³⁴ A o Balaam phenda e Devleke suechoke: Me cherdem o bilachipe, soke ni llanava kai tu sana kote, kai phandea mange o drom. A te nai chuke drago me ka iriv man.

³⁵ A o suecho e Devleko phenda leke: Sai ka lla gole llenenchar, a samo ka phene e alava kai me ka phenav chuke te phene.

O Balak ta o Balaam

³⁶ Kana asunda o Balak kai o Balaam avela, llelo te malavel le ande iek foro katar o Moab kai si pasa o pai katar o Arnon, kote kai getolpe e phuv.

³⁷ Ta kote o Balak phenda e Balaameeke: Bichaldem te ikharen tut ¿Soke ni avilan ka ikhardem tut? ¿A so misli kai nasti dav tut but barvalipe?

³⁸ A o Balaam phenda leke: Etalo kate avilem a nasti phenav niso so o Del ni phenela mange te phenav.

³⁹ Mapalal o Balaam ta o Balak lleletar ando Kiriat Jusot.

⁴⁰ Kote o Balak phenda te mundaren guruven ta bakren ta inllarda len kai o Balaam ta kai e birovura kai llana lea.

⁴¹ Thiarinako rano, o Balak inllarda e Balaamee llik upre katar o Bamot Baal, ta kote sai dikhla truial o pero katar o Israel.