Numeros 21 - Biblia ande chib Romani

O charo katar o Orma marelpe e israelenchar

¹ Kana o charo kananeo katar o foro katar o Arad, kai zivila ando Negeb, asunda kai phenena kai e israelita avena katar o drom katar o Atarim, llelo te marelpe lenchar ta istarda nesave llenen phangle.

² Ondaka e israelitura die po alav e Devle kai, te pomozila len te dobin gole phuvia, von ka zatrin sa lenge forura.

³ Ondaka o Del dia e israelen so manglea letar ta pomozisarda len te dobin e llenen kai si kananeura ta e israelita zatrisarde sa e kananeonen ta i lenge foronen, goleke gua than thode leko anav Orma.

O sap tucheko

⁴ Mapalal e israelita likiste katar o burdo katar o Or ta llele karing e Mora e Loli, gia te sai den truial katar e phuv katar o Edom ta pe gua drom o foro jasarda pi zor.

⁵ Ta o foro vazdinailo po Del ta po Moises ta thode te den lengi orba ta phenena: ¿Soke ikandan amen katar o Ejipto? ¿Te sai mera pe gava po pusto? Soke kate inai amen marrno ni pai. ¡Ta amen sam chinie katar gava marrno chorrikano!

⁶ Ondaka o Del bichalda lenge sapa kai mundaren, ta e sapa dandarena e foro ta but katar e israelita mule.

⁷ Ondaka o foro llelo kai o Moises ta phende leke: ¡Cherdam o bilachipe soke diam orbe bilache e Devleke ta i chire! ¡Man e Devletar te tradel e sapa amendar! O Moises mangla katar o Del te prostil e israelen.

⁸ A o Del phenda e Moiseseke: Cher chuke iek sap sargo gola ta thov le pe iek beli ta vareko te avela dandardo ta te dikhela karing o sap kai si pe beli ni ka merel.

⁹ O Moises cherda iek sap tucheko ta thoda le upral pe beli ta kana varesavo sap dandarela vareka ta gua lleno dikhela po sap tucheko ni merela.

E israelita iversas etapas

¹⁰ Mapalal e israelita lleletar ta izarde pe chare ando Obot.

¹¹ Ta kana lagle katar o Obot lleletar ando Ije Abarim, kai si angla o Moab kote inzarde pe chare po pusto kotar katar likel o kham.

¹² Lleletar kotar ta inzarde pe chare kai o pai katar o Sered.

¹³ Mapalal lleletar kotar ta inzarde pe chare pe ogoia rig katar o pai katar o Arnon. Gava pai si po pusto kai si llik kai e amorreura ta resel llik o Moab maskar o Moab ta e amorreura.

¹⁴ Katar gava del orba o lil katar o maripe katar o Del: Nakhlamkatar o Vaeb, ande phuv katar e Sufa, katar epaia katar o Arnon,

¹⁵ ta katar e paia kai resen ando Ar, ta kai resen llik kai o Moab.

¹⁶ Katar o pai ando Arnon lleletar llik ando Beer. Kai si bunari kote kai o Del phenda e Moiseseke: Chide e foro kai me ka dav len pai.

¹⁷ Kote si kai o foro llilabia: ¡Likel pai katar o bunari! ¡Llilaben e bunareke!

¹⁸ ¡E birovura anadele pe rovlinchar biromake, E llene katar e kris e foroki putarde le pe rovlienchar! Ta katar o pusto avile ando Matana.

¹⁹ Ta katar o Matana llele ando Naaliel ta katar o Naaliel ando Bamot,

²⁰ ta katar o Bamot ande bari umal kai si ande phuv katar o Moab llik upre katar o Pisga, kai si karing o pusto.

O Israel dobil e charo katar o Sion

²¹ E israelita bichalde nesave llenen kai o Sion charo katar e amorreura, te phenen leke:

²² Amen manga te nakha katar chi phuv, amen ni ka da ande che umalia kai si vostanura ta ni ande tumare drakha ta ni ka pia pai katar tumare bunaria. Ka nakha katar chi phuv katar o drom o baro.

²³ A o Sion ni mukla te nakhen katar leki phuv, ta chidia sa pe llenen ta llelo te maladol lenchar po pusto ta kana avilo ando Jaas mardape lenchar.

²⁴ A e israelita ta marde len te lie lengi phuv katar e len kai ikhardol Arnon llik kai e len kai ikhardol Jabok kai si pasa e phuv katar e amonita kai but arakhena la.

²⁵ Ta lia o Israel sa e forura katar e amorreura, o e Esbon ta leke forura ta achile te zivin ande lende.

²⁶ O Esbon saia o foro kai zivila o Sion, o charo katar e amorreura. O Sion mardaia pe omanglal e charaoia kai saia charo katar o Moab ta liea letar sa e phuv llik kai e len kai ikhardol Arnon.

²⁷ Goleke phenen e poeta: ¡Aven kai o Esbon, o foro baro katar o charo o Sion! ¡Vazden la pale zuriaren lake zidura!

²⁸ Katar o Esbon o foro katar o Sion, likisto o plamico katar iek bari iag, kai zatrisarda o Ar katar o Moab ta llik e gazden kai zivina llik upre katar o Arnon.

²⁹ ¡Tesko chuke Moab! ¡Zatrisailan, foro katar o del o Kemos! Vou mukla che llenen te nasen, ta che diskinien te peren ande va katar o charo Sion.

³⁰ Zatrisarde e zor katar o Esbon, katar o Dibon llik kai o Nofa sa achila zatrime, ta e iag resli llik kai e Medeba.

O Israel marel e Oggo charo katar o Basan

³¹ Gia si sar o Israel achila te zivil ande phuv katar e amorreura.

³² Ta i o Moises bichalda llenen te dikhen o foro katar o Jaser. Ta e israelita ta lie peke lenge forura minone ta e amorreura kai zivina ande lende e israelita tradie len.

³³ Mapalal irisaile karing o Basan, a o Og charo katar o Basan, llelo sa pe boñikonenchar te marenpe lenchar ando e Drei.

³⁴ Ondaka o Del phenda e Moiseseke: Na dara lendar kai me ka dav len ande che va ta i sa leke boñikonen ta lenge phuvia ta tu ka chere lea isto so cherdan e Sionea charo katar e amorreura kai zivila ando Esbon.

³⁵ Gia e israelita mundarde e Oge ta leke chaurren ta sa leke boñikonen. Ni mukle nika llundo ta lie peke lengi phuv.