Numeros 20 - Biblia ande chib Romani

O pai katar e pechina

¹ Ando purvo chon katar o burs, e israelita avile kai o pusto katar o Sin, ta vazdie pe chare ando Kades. Ta kote muli e Maria ta kote prajosarde la.

² Ta sar e llenen ni saia len pai chidinaile ta vazdinaile po Moises ta po Aaron,

³ ta phende leke: ¡Daboida mulama ogole israelenchar kai cherda o Del te meren!

⁴ ¿A soke tumen anden o foro e Devleko pa gava pusto? ¿A tumen mangen amen te mera ta amare zivirinie?

⁵ ¿Soke ikanden amen katar o Ejipto ta anden amen pe gava bilacho than? Kate nasti avel amen vostano, inai simochine ni drakha, ni granade ¡Ni pai te pia!

⁶ O Moises ta o Aaron durile katar o foro ta lleletar kai o udar katar e chara kai chidiniaona ta kote thodepe tele lligo lengo chikat dodisarda e phuv. Ondaka o baripe e Devleko sikadila lenge,

⁷ ta o Del phenda e Moiseseke:

⁸ Le e rovli ta tu ta cho phlal o Aaron chiden e llenen. Ta angla sa e llene phen e pechinake te del tumen pai ta ka dikhe kai katar e pechina ka likel pai te pien von ta e zivirinie.

⁹ Ondaka o Moises lia e rovli angla o Del, gia sar o Del phenda leke te cherel.

¹⁰ Mapalal o Moises ta o Aaron chidie e llenen angla e pechina ta phenda lenge: Asunen tumen kai ni kanden. ¿A so akana morabi te ikana pai katar gaia pechina te da tumen te pien?

¹¹ Ondaka o Moises vazdia po va ta chalada e pechina e rovliaia dui droma ta likista but pai ta pile e llene ta lenge zivirinie.

¹² A o Del phenda e Moiseseke ta e Aaroneke: A soke tumen ni avila tumen vera ande mande ta ni dien man liubao angla e israelita, ni ka den gale llenenchar ande phuv kai diem tumen.

¹³ Gala si e paia kai ikhardon paia katar e brasnia.

O Edom ni mukel te nakhel e israele

¹⁴ Katar o Kades, o Moises bichalda pala iek llene poroka kai o charo katar o Edom, te phenen leke: Tu llane sa o bilachipe kai nakhlam.

¹⁵ Amare purane lleletar ando Ejipto ta kote zivisarde but vreme, ta e ejipsiora sea but bilache amenchar ta i amare puranenchar.

¹⁶ Ondaka manglam te pomozil amen o Del ta vou asunda amaro avazi ta bichalda iek suecho, kai ikanda amen katar o Ejipto. Ta akana sam ando Kades, kai si pasa chi phuv.

¹⁷ Manga tutar te muke amen te nakha katar chi phuv. Ni ka nakha katar che vostanura ni katar che drakha ta ni ka pia pai katar che bunaria. Amen ka lla tar katar o drom o baro ta ni ka lika letar lligo ni ka nakha chi phuv.

¹⁸ A o charo katar o Edom phenda lenge: ¡Na nakhen katar mi phuv, soke te cherena le ka maladivav tumenchar me boñikonenchar!

¹⁹ E israelita phende leke: Amen ka lla katar o drom o baro ta amen o amare zivirinie te piaia pai katar che bunaria, ka pochina la chuke. So amen manga samo te nakha pirindo katar chi phuv.

²⁰ A o charo katar o Edom phenda lenge: ¡Ni ka nakhen! Ta llelo te maladol lenchar pe boñikonenchar lacharde te marenpe.

²¹ Iekhe misloia te na mukel len te nakhen katar pi phuv. Ondaka e israelita rodie aver drom.

O Aaron merel po burdo katar o Or

²² Sa o foro katar o Israel likisto katar o Kades karing o burdo katar o Or.

²³ Ta o Del dia orba e Moisesea ta e Aaronea po burdo katar o Or, pasa e phuv katar o Edom, ta phenda:

²⁴ O Aaron ka merel ta ni ka del ande phuv kai me dien e israelen, soke ni kandien man pe paia katar e brasnia.

²⁵ Tu, Moises, inllar e Aarone ta leke chaurre o Eleazare chak upre katar o burdo katar o Or

²⁶ ta kote ka ikane e patave popoke ta ka thove len po Eleazar. Soke o Aaron ka merel kote.

²⁷ O Moises cherda so o Del phenda leke te cherel angla sa e israelitura, likiste po burdo katar o Or,

²⁸ ta o Moises ikanda letar e patave popoke ta thoda len po Eleazar. Ta isto kote chak upre po burdo mulo o Aaron ta o Moises ta o Eleazar fuliste katar o burdo.

²⁹ Kana sa o foro dikhla kai o Aaron mulo sa e familie katar o Israel rovde tranda llive.