Numeros 2 - Biblia ande chib Romani

Sar morabi te inzaren pe chare

¹ O Del dia orba e Moisesea ta e Aaronoia, ta phenda lenge:

² E israelitura morabi te vazden pe chare pasa po bariako, ta te thoven iek ezgoda te dikhol lengi vicha. Ka vazden pe chare truial katar e chara e Devleki.

³ Pe rig katar o oriente ka vazden o bariako katar o pero katar o Juda, prema lenge boñikura, kai lengo birovi si o Nason chaurro katar o Aminadad.

⁴ Ta prema o llindipe lenge boñikura si eftavardes ta panch milie ta sov stotine.

⁵ Pasa lende ka inzaren pe chare e llene katar e vicha katar o Isakar, kai lengo birovi si o Natanael chaurro katar o Suar.

⁶ Ta prema o llindipe katar e muñikura kai si, pinda ta star milie ta star stotine.

⁷ Ta i lenchar ka inzaren pe chare e boñikura kai si katar e vicha katar o Zabulon, kai lengo birovi si o E liab, chaurro katar o Elon,

⁸ Ta prema o llindipe katar e boñikura kai si pinda ta eftavardes milie ta star stotine.

⁹ Goleke sa o pero katar o Juda, si stotina ta ojtovardes ta sov milie ta star stotine boñikura kai phiren anglal prema lenge viche kai marenpe.

¹⁰ Ando sur ka vazden o bariako katar o pero katar o Ruben, prema pe boñikura, ta lengo birovi o Elisur chaurro katar o Sedeur,

¹¹ Prema o llindipe lenge boñikura si saranda ta sov milie ta panch stotine.

¹² Pasa lende ka inzaren pe chare e boñikura katar e vicha katar o Simeon, kai lengo birovi si o Selumiel, chaurro katar o surisadai,

¹³ Ta prema o llindipe lenge boñikura si pinda ta inia milie ta trin stotine.

¹⁴ Ta ka inzaren pe chare lenchar e llene katar e vicha katar o Gad ta lengo birovi o Eliasaf chaurro katar o Reuel.

¹⁵ Ta prema o llindipe lenge boñikura si saranda ta panch milie ta sov stotine ta pinda.

¹⁶ Sa e boñikura llinde katar o pero katar o Ruben si stotina ta pinda ta iek milie ta star stotine ta pinda kai phirde po duito than.

¹⁷ Mapalal ka llan e Levitura maskar e star pere ta ka inllaren pea e chara kai chidiniaon. E star pere ka phiren iek palal katar aver, gia sar inzardea pe chare gia ka phiren suako lendar pasa po bariako.

¹⁸ O bariako katar o pero katar o Efrain ka avel ando oksidente, prema pe boñikura. Lengo birovi si o Elisama chaurro katar o abiud,

¹⁹ Ta prema o llindipe lenge boñikura si, saranda ta panch stotine.

²⁰ Ta pasa lende ka inzaren pe chare e boñikura katar e vicha katar o Manases, kai lengo birovi si o Gamaliel, chaurro katar o Pedasur,

²¹ Ta prema o llindipe lenge boñikura si, tranda ta dui milie ta dui stotine.

²² Ta lenchar ka inzaren pe chare e boñikura katar e vicha katar o Benjamin, kai lengo birovi si o Abidan, chaurro katar o Gidoni,

²³ Ta prema o llindipe lenge boñikura si tranda ta panch milie ta star stotine.

²⁴ Sa e boñikura llinde katar o pero katar o Efrain si stotina ta ojto milie ta stotina, ta ka phiren po trito than.

²⁵ Ando sur ka vazden o bariako katar o pero katar o Dan. Prema pe boñikura ta lengo birovi si o Aiezer chaurro katar o amisadai.

²⁶ Ta prema o llindipe lenge boñikura si sovardes ta dui milie ta efta stotine

²⁷ Ta lenchar ka inzaren pe chare e boñikura katar e vicha katar o Aser, kai lengo birovi si o Pagiel, chaurro katar o Okran

²⁸ Ta prema o llindipe lenge boñikura si saranda ta iek mlia ta panch stotine.

²⁹ Ta ka inzaren lenchar pe chare e vicha katar o Neftali, kai lengo birovi si o Ajira chaurro katar o Enan.

³⁰ Ta prema o llindipe lenge boñikura si pinda ta trin milie ta star stotine.

³¹ Sa e boñikura llinde katar o pero katar o Dan sea, stotina ta pinda ta efta milie ta sov stotine von ka llan chak palal pala po bariako.

³² Gala si e boñikura llinde katar o Israel prema lengi familia purani ta prema lenge pere ta prema lenge boñikura, sa von sea sov stotine ta trin milie ta panch stotine ta pinda.

³³ A e vicha katar e levitura ni sea llinde maskar o Israel, soke o Del phendaia e Moiseseke te na llinel len.

³⁴ Ta e israelitura cherde sa sar o Del phendaia e Moiseseke te cheren: suako lleno inzarda pi chara telal katar piro bariako ta phirde pe familiaia prema pi familia purani.