Numeros 19 - Biblia ande chib Romani

O zakono katar o jaladipe

¹ O Del dia orba e Moisesea ta e Aaronoia ta phenda lenge:

² Me o Del, si kai phenav te cheren gala ezgode: Phen e israelenge te anen chuke iek guruvmi te avel lake bal lole, te na avel nasuali ta kai nikada ni thode pe late o llugo.

³ Ta ka den la kai o Eleazar o popo ta vou ka ikanel la avri katar o pero ta ka cherel te mundaren la angla le.

⁴ O popo Eleazar ka lel cherricha rat pe po nai ta ka pechal e ratea efta droma karing e chara kai chidiniaon.

⁵ Mapalal ka phabaren e guruvmia angla le, laki morchi lako mas ta lako rat ta lako khul.

⁶ O popo ka lel oma iek kas katar o sedro ta iek grangorro cherdo e patrendar ta chiti lolo ta ka chudel len sa ande iag kai phabol e guruvmi.

⁷ Mapalal ka jalavel pe patave ta ka jalavel isto vou pe e paiea, ta mapalal sai ka del ando pero ta ka achel pokalime o popo llik kana ka perel e riat.

⁸ Isto gia ko phabarda la ka jalavel pe patave e paiea ta e paiea ka jalavel pi esnaga ta ka achel pokalipe llik kana ka perel e riat.

⁹ Ta iek lleno chisto ka chidel o prajo katar e guruvmi ta ka thovel len avri katar o pero pe iek rik chisti ta o foro ka guruvel gua prajo e paieke katar o chistope sa gava si iek kurbano pala o bilachipe.

¹⁰ Ko chidia o prajo, ka jalavel pe patave ta ka achel pokalime llik kana ka perel e riat. Gava si iek zakono ostade, kai mol pe gachin tumenge e israelita ta i e llenenge kai aven katar aver phuv ta kai zivin maskar tumende.

¹¹ Kor dodila varesavi esnaga muleki, ka achel pokalime efta llive.

¹² Pala o trito llive ta o eftato morabi te chistol pe e paiea katar o jaladipe ta ka achel chisto. A te na chistolape pala o trito llive o e eftato llive, ni ka achel chisto.

¹³ Vareko te dodila iek esnaga katar iek lleno mulo ta ni jalavelape, cherel te achel pokalime o santuario e Devleko. Ta pala gua so cherda gua lleno nasti ka zivil maskar e israelitura, soke ni thode pe lete o pai katar o chistope, goleke vou si pokalime.

¹⁴ Gava si o zakono kana iek lleno merel ande iek chara: Sa gola kai si ande chara ta gola kai den, ka achen pokalime efta llive.

¹⁵ Suako vasija putardi kai lako kapako inai phanglo sukar, ka achel pokalime.

¹⁶ A ande umalia ko dodila iek esnaga katar iek lleno kai mundarde le o kai mulo pala aver ezgoda, o dodila kokala manusenge, o iek limori, efta llive ka achel pokalime.

¹⁷ Kana nakhena gala ezgode, ka len cherricha katar o prajo katar e guruvmi kai dia kurbano pala o bilachipe ta ka thodol ande iek vasija te sai toven upral pai katar e len.

¹⁸ Mapalal iek lleno kai si chisto ka lel iek grango patrenchar ta chingarel la e paiea ta kole grangoia ka chingarel e chara, e vasije ta e llenen kai sea kote ta i e llene kai dodisarda e kokala o dodisarda e llene kai mundarde o kai dodisarde iekhe llene kai mula katar fiso o dodisarda iek limori.

¹⁹ O lleno kai si chisto ka chingarel e llene kai si pokalime ando llive trito ta ando eftato llive gua lleno ia chistosarda le. Ondaka o lleno pokalime ka jalavel pe patave ta ka jalavel isto vou pe e paiea, ta ka achel pokalime ligo ni ka perel e riat.

²⁰ A o lleno kai si pokalime te na chistolape, gua lleno morabi te avel tradino maskar po foro, soke pokalil o santuario e Devleko. Soke ni chingarde le e paiea katar o chistope, goleke achel pokalime.

²¹ Gava si iek zakono ostade. O lleno kai chingarela avere e paiea katar o chistope, morabi te jalavel pe patave. Ko dodila o pai katar o chistope ka achel pokalime lligo ni ka perel e riat.

²² Sa e ezgode kai dodila o lleno kai si pokalime gola ezgode ka achen pokalime, a ko dodila iekhe llene kai si pokalime i vou ka achel pokalime lligo ni ka perel e riat.