Numeros 18 - Biblia ande chib Romani

E popura ta e levita

¹ O Del phenda e Aaronoke: Tu ta che chaurre ta sa e llene katar e vicha katar o Levi, katar san tu, ka aven dosale pala o bilachipe kai cherena po santuario, a samo tu ta che chaurre ka aven dosale pala o bilachipe kai cherena pe tumaro rado poponengo.

² A morabi te chere ogola llene katar e vicha katar o Levi, katar tu san, te sai pomozin tut ta che chaurren ando rado angla e chara katar e alava.

³ Ta von ka aven tala cho va ta ka arakhen e chara, a nasti ka aven pase pasa e ezgode katar o santuario ta pasa o altar, te na kandena ka meren von ta i tumen.

⁴ Morabi te aven tuia pe sa o rado katar e chara kai chidiniaon a ni iek lleno kai inai tumendar nasti ka avel pasa tumende,

⁵ Tumen sen thode te arakhen o santuario ta te arakhen o altar gia te na avel ios mi joli pe e israelita.

⁶ Me fuladem che phlalen e levita katar ogola israelita te dav len tumenge, te sai radin po rado katar e chara kai chidiniaon,

⁷ A samo tu ta che chaurre sai ka cheren o rado poponengo pe sa o rado katar o altar, o kai cherdol palal katar e kortina. Gava rado si tumaro, soke me diem tumen o rado poponengo. A vareko te cherela o rado poponengo, a vou inai popo, gole lleneke ka chindol te merel.

O prabardipe katar e popura ta e Levita

⁸ O Del phenda e Aaronoke: Me thodem tut te arakhe e ofrende kai den man. Sa e ofrende sante kai den man e israelita, dav len chuke ta che chaurrenge pala o rado kai cheren mange gava ka avel iek zakono ostade.

⁹ Katar e ofrende kai phabardon chire ka aven sa e ofrende katar e septelie ta katar e ofrende kai denpe cheres o bilachipe o cheres e dosa kai e israelita den man, sa gala ofrende sande ka aven chuke ta che chaurrenge.

¹⁰ Ando santuario ka jan katar e ofrende, soke si ofrende sante.

¹¹ Ta i dav tut ta che chaurren ta che chorren kai zivin tuia, e ofrende kai si thode upre kai anen angla ma e israelita. Gava ka avel iek zakono ostade. Vareko katar chi familia kai chera o zakono te chistolpe sai ka jal lendar.

¹² Ta i dav tut e purve septelie kai e israelita anen mange suako burs: O mai lacho zeitino, e mai lachi mol ta katar o lliu.

¹³ Ta i e purve septelie katar o chidipe kai von den man, ka aven chuke. Suako lleno katar chi familia kai cherda o zakono katar o chistope sai ka jal len.

¹⁴ Suako ofrenda kai ka chinaven mange ka aven chuke.

¹⁵ E purve chaurre kai ka maladon e israelenge ta i e purve zivirinie kai maladon, kai den man ka aven chuke. A katar e zivirinie kai i nai chiste tu ka amenge te pochinen len te sai len len.

¹⁶ Sai ka pochinen len pala o chon kai ka maladon ta ka avel o pochindipe panch tolaria rupune, prema e love katar o santuario, kai phariaven desuiek gramura.

¹⁷ A ni ka muke te pochinen e purve minone katar e gurumia katar e bakre o katar e busnenge. Gala si chinade mange ta ka zivirinie morabi te mundare len ta lengo rat ka peravele upral po altar ta lengi khoi sargo ofrenda phabardi kai khandel sukar e Devleke,

¹⁸ tu sai ka ache e masea ta i o brek katar e zivirinia, kai si iek ofrenda kai miskon la ta i e plieska e kachi, ka avel chiri

¹⁹ Sa e ofrende sante kai e israelita den man, me dav len chuke ta che chaurrenge ta che chorrenge kai zivin tuia. Gava ka avel iek zakono ostade. Si iek alava kai nasti phagon, kai si ostade kai me achav tuia ta che porodoia.

²⁰ O Del phenda e Aaronoke: Tu ni ka avel tut phuv ni bar ando Israel, sargo ogola israelita. Me ka avav chi phuv ta so ka avel tut ando Israel.

²¹ Me dav livitaonen sa e diesmora ando Israel gava si so ka avel len pe po rado, soke von radin ande chara kai chidiniaon.

²² Ogola israelita morabi te na aven pase pasa e chara kai chidiniaon, soke te cherena le gua avela iek bilachipe kai sai anel lenge o meripe.

²³ Samo e levita ka radin e charake kai chidiniaon, ta von si kai ka inllaren o bilachipe katar e israelita. Gava ka avel iek zako ostade tumare porodoke ta ni ka avel tumen phuv maskar o Israel.

²⁴ Soke e levitaonen diem lem e diesmura kai e israelita den man ofrenda. Goleke phendem lenge kai maskar e israelitura tumen ni ka avel tumen phuv te avel tumari.

²⁵ O Del dia orba e Moisesea ta phenda leke:

²⁶ Phen e levitonenge kai kana ka len katar e israelita o diesmo kai die tumen te len lendar, tumen ka den katar gua diesmo iek ofrenda kai miskon e Devleke o diesmo katar o diesmo.

²⁷ Gava si so ka den gia sar cheren le e israelita kana den o diesmo katar po lliu ta katar pi mol.

²⁸ Gia tumen ka den o ofrenda e Devleke katar sa tumaro diesmo kai ka len katar e israelita ta katar so ka len ka den ofrenda e Devleki e popoke o Aaron.

²⁹ Suako ofrenda kai ka den man morabi te avel katar o mai sukar katar so den tumen.

³⁰ Ta i phen lenge: Kana tumen e levita ka den man o mai sukaripe katar e israelita, gua kai ka achel tumen ka llindol tumenge sargo kana si tumaro lliu o tumari mol,

³¹ Ta tumen ta tumari familia sai ka jan le pe suako rig. Gava si tumaro pochindipe pala o rado kai cheren ande chara kai chidiniaon.

³² Ta kana tumen lacharena o mai lachipe mange sai ka jan katar so achila bi te cheren o bilachipe gia tumen ni ka meliaven e ofrende sante katar e israelita ta ni ka chindol tumenge te meren.