Numeros 12 - Biblia ande chib Romani

E Maria ta o Aaron den orba e Moiseseki

¹ E Maria ta o Aaron thode te den orbe bilache e Moiseseke, soke vou zinisailoa iekhe diskiniaia kai saia etiope.

² Ta i phende: O Del ni dia orba samo e Moisesea, i amenchar dia orba. A o Del asunda so von phenena.

³ A o Moises saia o lleno but prosto. Pe sa e phuv ni saia iek lleno mai prosto neko o Moises.

⁴ Goleke o Del phenda e Moiseseke, e Aaronoke ta e Mariake: Llan tumen trin kai e chara kai chidiniaon. Ta e trin llele:

⁵ Ondaka o Del fulisto ando oblako, ta thodape po udar katar e chara kai chidiniaon, mapalal ikharda e Aarone ta e Maria ta kana von avile

⁶ o Del phenda lenge: Asunen gaia orba kai ka phenav tumenge: Kana si maskar tumende iek profeta murno, me ka sikavav leke ezgode ta ande sune ka dav orba lea,

⁷ A me slugaia o Moises ni cherav le gia, soke vou si o mai chacho katar sa me sluga,

⁸ ta lea dav orba mui muiea ta bristomaia, ¿A sar tumen troman te den orbe bilache leke?

⁹ O Del but jolailo lenchar, ta llelotar.

¹⁰ Ta kana o oblako llelotar katar e chara kai chidiniaon, e Maria nasuaili katar e lepra, achili parrni sargo o iv. Kana o Aaron boldinailo te dikhel e Maria, ta dikhla kai saia leprosa,

¹¹ phenda e Moiseseke: Na mo gazda na thov pe amende gava bilachipe kai cherdam dilimaia.

¹² Na muk voi te achel sargo iek baiato mulo mai anglal te biandol, kai biandol pe masea sargo drobome.

¹³ Ondaka o Moises phenda e Devleke: Moliman chuke Devla sastar la akana.

¹⁴ A o Del phenda leke: A lako dad te chungardiaia pe lako mui, achilia ando lallao efta llive goleke te traden la katar o pero efta llive ta mapalal sai ka irilpe.

¹⁵ Gia si sai tradie e Maria katar o pero efta llive. A ande gola llivesa o foro ni llelotar kotar.

¹⁶ Mapalal katar gaia ezgode, o foro llelotar katar o Aserot, ta inzarde pe chare po pusto katar o Param.