Numeros 11 - Biblia ande chib Romani

O Del bichalel chiriklien

¹ Iek llive e israelitura thode te den orbe bi malade e Devleke pala o bilachipe kai nakhena. Kana o Del asunda len, jolailo but ta bichalda lenge iek iag kai phabarda truial o pero.

² O foro urkisarda ta mangla te pomozin len o Moises, a o Moises mangla katar o Del te pomozin len. Ondaka e iag muli.

³ Goleke goia rig ikharde la Tabera, soke kote e iag e Devleki phabili pe lende.

⁴ Maskar e israelitura sea llene katar aver phuvia ta bokhaile but kai nasti terpina e bok, ta e israelita thode pale te roven ta phenena: ¡Gia sukar avela vareko te del amen te ja mas!

⁵ ¡Da amen golli sar jaia o macho ando Ejipto! ¡Ta e pepinura, e jurbuze, e siria, ta e purumba!

⁶ A akana mera bukhatar, ta ni dikhol ni iek ezgoda samo gava mana.

⁷ O mana dikhola sargo e simicha katar o silantro, dikhola galbeno, sargo e resina,

⁸ Ta kana jalape saia sargo o marrno cherdo katar o lliu e zeitinoia nevo. E llene llana te chiden le ta mapalal drobonale ando isav ta chiravena le o cherena le sargo marrno.

⁹ Ta orachaia kana pechala peke po pero i o mana perela po pero.

¹⁰ O Moises asunda kai e isralitura ta lenge familie rovena angla pe chare. Ta o Del but jolailo. Ta i o Moises jolailo,

¹¹ ta phenda e devleke: ¿Soke cherdan gava bilachipe mange? ¿So si chuke manchar, soke thodan pe mande sa gava pharipe gale foroko?

¹² ¿A so me sem lengo o dad o lengi dei te sai mange mandar te inllarav len ande me va, sargo minone kai pien kolin, llik kai e phuv kai phendan lenge puranenge kai ka delen?

¹³ ¿Katar ka ikanav mas te sai dav te jal sa gale sueto? Von aven mande roimaia te phenen mange: De amen mas te ja.

¹⁴ Me korkorre nasti terpiu gale foro, soke si mange iek pharipe but baro.

¹⁵ A te cherea gia manchar mai sukar mundar man, te si kai de istina kai voli man. Na muk man te dikhav mi zatrania.

¹⁶ A o Del phenda leke: Chide mange eftavardes phuren katar o Israel, katar gola llene kai tu llane kai si phure ta kai si birovora katar po foro, ta an len kai e chara kai chidiniaon ta kote te aduricharen tuia.

¹⁷ Ta me ka fuliav ta kote ta ka dav orba tuia ta ka lav katar o duo kai si ande tu ta ka dav len te sai pomozin tut te inllare gava pharipe gale foroko. Gia tu ni ka ave korkorre.

¹⁸ Mapalal phen e foroke te chistol pe thiarinake ta ka jan mas. Soke asundem len sar roven te phenen: ¡Daboida vareko te del amen te ja mas! ¡Mai sukar sama ando Ejipto! goleke me o Del, ka dav tumen mas te jan,

¹⁹ ta ni ka jan samo iek llive o dui o panch o des o bis. Iok

²⁰ Ka jan mas sa o chon, lligo ni ka likel katar lenge nakha ta lligo ni ka gadonpe, soke mukle man o Del, kai sem maskar lende ta rovde anglama ta phende: ¿soke likistam katar o Ejipto?

²¹ Ondaka o Moises phenda: O foro kai llal manchar si sov stotine murusa kai phiren. ¿A tu phene kai ka de amen te ja mas sa o chon?

²² ¿Kai si pegachin bakre ta guruva kai san mundardon ta te resen saurrenge? I te daia len sa e mache e morake, ni resela len.

²³ A o Del phenda leke: ¿Tu misli kai ia minoni si mi zor? akana ka dikhe o ka cherdol o iok so phendem.

Eftavardes phure den orba sargo poraukura

²⁴ O Moises likisto ta phenda e foroke so o Del phenda leke, ta chidia eftavardes phuren israelita ta thoda len truial katar e chara kai chidiniaon.

²⁵ Ondaka o Del fulisto ando oblako ta dia orba e Moisesea, ta lia katar o duo kai saia ando Moises ta thoda le ande eftavardes phure. Ta samo fulisto o duo upral pe lende, thode te den orba sargo poraukura ta ni achena.

²⁶ A ando pero achilea dui llene, kai ikhardona iek Eldad ta o gua Medad, von sea katar e eftavardes llene ezbirime, a von ni llelea kai a chara kai chidiniaon von achilea ando pero. A i pelende fulisto o duo, ta thode te den orba sargo poraukura ando pero.

²⁷ Ondaka iek chaurro llelo prastindo te phenenl e Moiseseke: ¡O Eldad ta o Medad den orba sargo poraukura ando pero!

²⁸ Ondaka o Josue, chaurro katar o Nun, kai de terno pomozila e Moisese, phenda: ¡Moises mo gazda, achav len!

²⁹ A o Moises phenda leke: ¿San joliariko cheres ma? ¡Pe gachin voliva me sa o foro e Devleko te aven poraukura!

³⁰ Ondaka o Moises ta e phure katar o Israel irisaile kai o pero.

O Del bichalel kodornise

³¹ O Del cherda te phurdel iek balav katar e mora kai anda but kodornise, kai peletar ando pero ta i truial letar, sea pegachin kai sai phirea sorro llive ta sai dikhea len sar ucharena e phuv iek metro upral.

³² Sa gua llive ta sa goia riat ta i ogua llive kai avilo e llene chidena kodornise. O lleno kai mai cherricha chidia, chidia des unpe kodornise, kai thode len te sukon truial o pero.

³³ A kana e israelita thodea pe te jan o mas o Del jolailo lenchar ta dukhada len, cherda bute llenen te meren.

³⁴ Goleke gua than thode leko anav Kibrot Jataava, soke kote prajosarde e llenen kai samo mislinape te jan.

³⁵ Ta katar o Kibrot Jataava laglo o foro ta avile ando Aserot, ta kote achile.