Numeros 10 - Biblia ande chib Romani

E tuturuge rupune

¹ O Del dia orba e Moisesea ta phenda leke:

² Cher dui tuturuge rupune marde e chokanoia, kai ka trubun tut te sai ikhare e sueto ta te llanen kana te laden.

³ Kana ka basalen e dui tuturuge, sa o foro morabi te chidiniaol angla tute, kotar katar delpe ande chara kai chidiniaon e Devlea.

⁴ A kana ka basaldol samo iek, ka chidiniaon samo e birovoria katar e viche.

⁵ A kana ka basalen e tuturuge ta ka urkin, gola llene kai si lenge chare inzarde pe rig kai si ando oriente, ka thovenpe te laden,

⁶ a kana ka basalen o duito drom ka thoven pe te laden e llene kai lenge chare si inzarde pe rig ando sur. Kana ka basalen e tuturuge ta ka urkin kote si kai morabi te laden.

⁷ A samo kana ka basalen e tuturuge gua si kai o sueto morabi te chidiniaol.

⁸ E llene kai morabi te basalen e tuturuge si e popura, e chaurre katar o Aaron. Gava ka avel iek zakono ostade tumenge.

⁹ Kana tumare dusmanura avena te marenpe tumenchar ande tumari phuv ta kana ka llan te marentumen, basalen e tuturuge ta urkin zurale. Gia me tumaro Del ta Gazda, ka dav man golli tumendar ta ka braduin tumen katar tumare dusmanura.

¹⁰ Ta i basalen e tuturuge ande llivesa vesele, sargo ande llivesa slavake kana aven o purvo chon, ka basalen e tuturuge kana ka den ofrende phabarde e Devle ta kana ka den kurbanura pala e pas. Gia me ka dav man golli tumendar. Me sem o Del tumaro Gazda.

E israelita laden katar o Sinai

¹¹ O llive bis katar o chon duito katar o duito burs, vazdinailo o oblako upral katar o santuario katar e alava.

¹² E israelitura thodepe te laden ta likiste katar o Sinai, ta o oblako achilo po pusto katar o Paran.

¹³ Ta lagle o purvo drom gia sar o Del phendaia e Moiseseke te cheren le,

¹⁴ o purvo llana e bonllikura kai inllare o bariako katar o Juda ta kai lengo borovi saia o Naason, chaurro katar o Aminadab.

¹⁵ Angla e bonllikura katar e vicha katar o Isakar saia o Natanael, chaurro katar o Sua.

¹⁶ Ta angla e bonllikura katar e vicha katar o Zabulon sai o Eliab, chaurro katar o jelon.

¹⁷ E chaurre katar o Jerson ta e chaurre katar o Merari sea thode te inllaren o santuario ta inllarde le kana perade le.

¹⁸ Mapalal llana e bonllikura kai illarena o bariako katar o Ruben, kai lengo birovi saia o Eliesur, chaurro katar o Sedeur.

¹⁹ A angla e bonllikura katar e vicha katar o Simion, saia o Selumiel, chaurro katar o Zurisadai.

²⁰ Angla e bonllikura katar e vicha katar o Gad saia o Eliasaf, chaurro katar o Reuel.

²¹ Mapalal llala o porodo katar o Keat, kai inllarena e ezgode sante. Kana von avena, von malavena o santuario vazdino.

²² Mapalal llana e bonllikura kai inllarena o bariako katar o Efrain ta kai lengo birovi saia o Elisama, chaurro katar o Amiud.

²³ Angla e bonllikura katar e vicha katar o Manases saia o Gamaliel chaurro katar o Pedasur.

²⁴ A angla e bonllikura katar e vicha katar o Benjamin saia o Abidan, chaurro katar o Gidoni.

²⁵ Mapalal palal katar ogola bonllikura, llana e bonllikura kai inllarena o bariako katar o Dan ta kai saia lengo birovi o Ajiezer, chaurro katar o Amisadai.

²⁶ Angla e bonllikura katar e vicha katar o Aser saia o Pagiel, chaurro katar o Okran.

²⁷ Angla e bonllikura katar e vicha katar o Neftali saia o Aira, chaurro katar o Enan.

²⁸ Gia si sar llana e bonllikura katar o Israel kana ladena.

O Moises ta o Obab

²⁹ Iek llive o Moises phenda e Obabneke, chaurro katar o Reuel o madianita: Amen llatar kai e phuv kai o Del phenda kai ka del amen. Aide amenchar ta ka pomozi tut, soke o Del phenda kai ka arakhel e israele.

³⁰ A o Obab phenda leke: Iok soke me ka iriv man kai mi phuv kote kai si mi familia.

³¹ O Moises phenda leke: Me molimam chuke na llatar soke tu llane kai si e thana po pusto kai sai inzara amare chare ta sai sikave amenge o drom katar te lla.

³² Te llaia amenchar ka fulava tuia sa o lachipe kai ka del amen o Del.

³³ Gia si sar lleletar katar o burdo e Devleko ta phirde trin llive. A e arka katar e alava e Devleke llala anglal lendar, te rodel kai te inzaren pe chare.

³⁴ Ta ollivesea thiarinako rano kana von thovenape te phiren o oblako e Devleko llala upral pe lende.

³⁵ Ta kana e arka miskolape, o Moises phenela: ¡Uste Devla! ¡Ta che dusmanura te rispinpe! ¡Ta te nasen tutar gola kai murzin pe tute!

³⁶ A kana e arka achela o Moises phenela: ¡Irisao akana, Devla, kai cho foro kai si but baro!