Nejemias 9 - Biblia ande chib Romani

O Esdras phenel o bilachipe katar o Israel

¹ Ando llive bis ta star isto katar gua chon, e israelitura chidinaile te cheren alluno, thode pe pete patave zalosne ta chudie chik pe po soro,

² fuladile katar gola kai ni sea judiura, thodepe pe porrne ta phende po bilachipe ta o bilachipe katar lenge papura.

³ Ta trin saiata achile isto kote pe porrne, ta chitisarde angla e llene o lil katar o zakono e Devleko, ta aver trin saiata ios phende po bilachipe ta blagosisarde e Devle.

⁴ Mapalal i e levitura o Josue, o Bani, o Kadmiel, o Sebanias, o Bunui, o Serebias, o Bani ta o Kenani likiste upral po than vazdino ta ikharde ando baro avazi pe Gazda e Devle.

⁵ Mapalal e levitura o Josue, o Kadmiel, o Bani, o Jasabnias, o Serebias, o Odias, o Sebanias ta o Petajias phende gia: Usten pe porrne, ta blagosin e Gazda tumaro Del allive ta thiara ta sa e llivesa, ¡te avel blagosime, blagosimaia ta llilabimaia leko baro anav!

⁶ Ta o Esdras phenda gia: Samo tu san o Del, tu cherdan o kham ta e phuv, o miloso e milosoko, ta sa leke cheraia. Tu cherdan e phuv ta sa so si pe late, e mora ta sa so si andre. Tu de sivoto saurren, ta e cheraia katar o miloso blagosin tut.

⁷ Tu Gazda, san o Del kai esvirisardan e Abrame, tu ikandan le katar o Ur, foro katar e kaldeura, ta thodan leko anav Abraam.

⁸ Dikhlan kai uzdilape ande tute, ta dian le cho alav kai ka de leke porodo e phuv katar e ititura, katar e amorreura, katar e ferezeura, katar e jebuseura ta katar e jergeseura.

⁹ Tu dikhlan savi patnia nakhle amare purane ando Ejipto, ta asundan sar rovena pasa e Mora e Loli.

¹⁰ Dukhadan bare ezgodenchar e Faraono, leke slugen ta sa e llenen katar leki phuv, soke llanglan kai sea silne e llenenchar katar o Israel. Goleke san gia asundo akana.

¹¹ Putardan po dopas e mora angla lende ta nakhle po maskaral pe phuv suki, a e llenen kai llana pala lende cherdan te achen chak telal, sargo iek barr ando baro pai.

¹² Inllardan len ollivesea pala iek oblako ta orachaia pala iek oblako iagako, te sai del o villelo po drom kai saia te phiren.

¹³ Mapalal fulistan upral po burdo Sinai ta dian lenchar orba andar o miloso, dian len krisa orta, sikadipe chachuno, zakonura ta alava lache.

¹⁴ Cherdan te pinllaren cho santo sabado, ta dian len zakonura ta o sikadipe chachuno, che slugaia e Moisesea.

¹⁵ Ta i dian len o marrno katar o miloso te chaliare len, ta pai katar o barr te phage lengi trus. Mapalal phendan lenge te len e phuv kai dian cho alav kai ka de len.

¹⁶ A amare purane istardona but ta ni kandena, ta ni thode sama pe che zakonura.

¹⁷ Ta ni kamle te kanden, ni diepe golli e bare ezgode kai cherdan pala lende. Gia zurale sureke sea kai thode iekhe gazda te inllarel len pale te aven sluge ando Ejipto. A tu san iek Del kai prostil, iek Del kai si chuke zalba, terpi ta san pherdo volipe, ta ni muklan len korkorre.

¹⁸ Ni kana von cherde iek telcho katar o sastri biladino ta phende kai gua saia lengo del kai ikanda len katar o Ejipto, ta ni kana cherde chuke baro bilachipe,

¹⁹ tu ando baro volipe kai si tut, ni muklan len korkorre po pusto. O oblako kai inllarela len ollivesea ni llelotar lendar, ni o oblako iagako kai dela len o villelo po drom kai saia te phiren.

²⁰ Ta dian len cho duo te sikave len, nikada ni lian katar lengo mui o mana kai bichalea lenge, ta dian len o pai te phage lengi trus.

²¹ Saranda burs dian len te jan po pusto, ta ni trubula len niso. Ni murisaile lenge patave ta ni suvlile lenge porrne.

²² Dian len charoine ta phuvia, ta fuladan len lenge ande umalia, ta von lie peke o Sijon, phuv katar o charo katar o Jesbon, ta o Og, phuv katar o charo katar o Basan.

²³ Cherdan te aven len but minone sargo e cheraia ando miloso, ta inllardan len te len peke e phuv kai phendana kai ka de lenge puranen,

²⁴ ta von die ando Kanaan ta liele peke. Dian ando lallao angla lende e llenen kai zivina ande goia phuv, ta lenge charura ta e llene katar goia phuv dian len ande lenge va te cheren lenchar so von mangle.

²⁵ Ta i lie peke forura zidome kai saia len lachi phuv, chera kai sea pherde lachipe, bunaria, drakha, kasta maslinkenge ta but kasta kai den septelie. Jale ta chalile, thulile ta veselisaile ande cho baro volipe.

²⁶ A von ni kamle te llan pe cho drom ta ni kamle te kanden cho zakono. Ta i mundarde che porauken, kai phenena lenge te irinpe tute, ta dukhade tut zurale.

²⁷ Goleke dian len kai lenge dusmanura te gazdarin pe lende ta patisarde len, ta kana sea dukhade, mangle tutar te pomozi len, a tu, kai si chuke gachin zalba lendar, asundan len katar o miloso, ta dian len llenen te kurtulin len katar lenge dusmanura.

²⁸ A samo saia len cherricha pas, pale cherena o bilachipe angla tu, goleke muklan te gazdarin pe lende lenge dusmanura, ta pale mangena tutar, a tu, pherdo volipe, asunea len katar o miloso, ta braduia len but droma.

²⁹ Phenea lenge te kanden che zakonura, a von ande po istardipe phagena che zakonura, kai den zivoto e llenen kai kanden len.

³⁰ Terpisardan lenge but vreme, ta katar o mui e profetonengo dian orba che duoia, a von ni thode sama, goleke tu muklan te gazdarin pe lende e llene katar e phuvia.

³¹ A pala o baro zao kai si chuke pala lende ni zatrisardan len, ta ni muklan len korkorre, soke tu san iek Del kai si chuke zalba.

³² Goleke, Devla kai san amaro Del, Del baro, zuralo ta kai del dar, kai ni phage cho alav ta cho baro volipe, thov sama pe bare nuzde kai nakhle amare charura, amare gazda, amare popura ta amare poraukura ta amare purane, ta sa o foro, sar kana sea e charura katar e Asiria llik akana.

³³ A pe tute inai ni iek dos katar sa gala ezgode kai nakhlam, soke tu sana chacho, a amen cherdam o bilachipe:

³⁴ Ta ni amare charura, ni amare gazda ni amare popura, ni amare purane, ni cherde so phenel cho zakono ta ni thode sama pe che alava ni kana dea pe lende.

³⁵ Kana von zivina ande po gazdaripe, ande sa o lachipe kai dian len ta ando barvalipe ta ande bari phuv kai muklan lenge, ni blagosisarde tut ta ni mukle e ezgode bilache kai cherena.

³⁶ A akana, cherdilam sluge isto ande phuv kai dian amare puranen te zivin katar lako lachipe.

³⁷ Ta e charura jan ta pien katar e but septelie kai del e phuv, ta muklan len pe amende pala amaro bilachipe. Gazdarin pe amende sargo mangen ta i pe amare guruva. Goleke sam gia dukhade.

O foro del po alav kai ka kandel o zakono

³⁸ Goleke amen diam amaro alav ta pisisardamle, ta po lil thode o sello ta pisisarde pe anava e llene mai glamne, e levitura ta e popura.