Nejemias 5 - Biblia ande chib Romani

Bari nuzda ando foro

¹ Ande gola llivesa e llene katar o foro ta e diskinie, chidinaile te balavin isto pe judiura,

² ta nesave llene phenena kai si len but chaurre ta chorra, ta kai saia te mangen unllile lliu te na meren bokhatar,

³ a aver llene phenena kai saia te muken ando unllilipe pe umalia, pe drakha ta pe chera pala e bok,

⁴ ta aver llene phenena kai saia te mangen love unllile te pochinen e love e charoke, ta mukena ando unllilipe pe umalia ta pe drakha. Ta i phenena gia:

⁵ Amen ta e llene katar gaia phuv sam isto katar iek vicha, amare chaurre si isto sargo lenge chaurre. A amen morabi te muka amare chaurren ta amare chorren te gazdarin pe lende. Ta nesave katar amare chorra akana si lenge sluge, ta nasti chera niso te la len, soke amare umalia ta amare drakha akana si averenge.

⁶ Kana asundem so phenena, pherdilem joli.

⁷ Mislisailem sa gala ezgode, ta llelem te dav pe glamne, pe llene kai gazdarin ta phendem lenge kai von len bare love po unllilipe e llenendar kai si isto katar lengi phuv, ta phendem te chera iek kris sa e llenenchar ta te putaol gaia orba,

⁸ ta phendem lenge gia: Amen prema so sai chera, liam amare llenen e judionen kai sea bichinde ande phuvia, ¿a tumen bichinen llik tumare phlalen, ta ka bichinen len amenge? Ta ni phende niso, soke ni saia len so te phenen.

⁹ Inai sukar so cheren. Saia te dikhol kai tumen den liubao e Devle, ta gia te na maren amendar espurnia amare dusmanura kai ni pachan ando Del,

¹⁰ ta e llene katar mi familia, e llene kai pomozin man ta i me diem len unllile love ta lliu, goleke, aven ta prostisara len so si amenge unllile.

¹¹ Ta isto akana mangav te irin lenge umalia, lenge drakha, lenge kasta simochinenge ta lenge chera, ta te na aven tumenge ios unllile, avena love, lliu, mol o zeitino ta na mangen lendar love upral po unllilipe.

¹² Von phende leke: Ka iri sa gola ezgode, ta ni ka manga lendar niso. Ka chera isto giasar phendan amenge. Ondaka ikhardem e poponen, ta isto angla lende phendem te jan sovel kai ka cheren gia sar phende.

¹³ Ta chinosardem me patave ta phendem: Daboida isto gia te chinol o Del katar po cher ta katar sa so si le suakone llene kai ka phagel gala sovel, ta te lel letar sa so si le akana. Sa e llene kai sea kote phende: Amen, ta blagosisarde e Devle.

O lachipe katar o Nejemias

¹⁴ E llene ni phagle pe sovel, ta desudui burs, sar kana charoila o Artajerjes thoda man te gazdariu pe phuv katar o Juda, llik kai o burs tranda ta dui katar leko gazdaripe, a ni me ta ni e llene kai pomozin man ni jalam so dela amen o charo.

¹⁵ A e gazda kai sea mai anglal mandar, cherdilea iek pharipe e foroke, soke suako llive jana saranda tolaria rupune ando jape ta e mol. Ta i e llene kai radina leke gazdarina po foro. A me ni cherdemle pala o liubao kai si te dav e Devle.

¹⁶ Ta i radisardem te sai vazdiniaol o zido e foroko, ta ni liem mange umalia. Ta e llene kai radina mange, saurre radisarde te vazden o zido.

¹⁷ Pe mi sinia besena po stotina ta pinda llene, judiura katar o foro ta i llene kai gazdarina ando foro, bi te llindon e llene kai avena te dikhen amen katar e phuvia kai sea pase.

¹⁸ Ta o jape kai me cherava saia: Iek guruv ta sov katar e mai lache bakre, ta chiriklia. Ta suako des llive saia but mol, me sema gazda ando foro a nikada ni manglem e love kai perena man, soke o foro nakhela bari patnia.

¹⁹ ¡De tut golli mandar Devla, pala sa e ezgode kai cherdem gale foroke!