Nejemias 4 - Biblia ande chib Romani

E dusmanura maren espurnia

¹ Kana o Sanbalat llangla kai amen vazdaia o zido, jolailo zurale ta thoda te marel espurnia katar e judiura.

² Ta phenela gia angla e llene kai llana lea ta angla e boñikura: ¿So istardon gia gala judiura bokhale? ¿So mislin kai ka muka len te cheren kurbanura pale? ¿O kai ka geton po rado ande iek llive? ¿O mislin kai chiden katar o prajo e barra phabarde?

³ Ta o amonita kai saia pasa le phenda gia: Dikhen kote o zido kai lacharen, ¡te mukelpe pe lete iek lisicha ka peravel le!

O Nejemias molilpe

⁴ Ondaka molisailem gia: Devla, tu san amaro Del: Asun sar maren amendar espurnia. Cher te perel pe lengo soro sa so phenen, ta lenge dusmanura te inllaren len phangle ande aver phuv.

⁵ Na uchar lengo bilachipe, ta na kos lendar lengo bilachipe kai si angla tute, soke kusle e llenen kai vazden o zido.

E dusmanura thoven lenge kasti

⁶ Ta vazdiam o zido llik kai o dopas. Ta e llene radina sa pe liea.

⁷ A kana o Sanbalat, o Tobias, e arabura, e llene katar o Amon ta e llene katar o Asdod llangle kai vazdaia o zido katar o Jerusalem, ta kai thodama amen te lachara o putardipe kai saia po zido, jolaile zurale,

⁸ ta saurre achile pe orba te den ando Jerusalem ta te zatrin le.

⁹ Ondaka molisailam amare Devleke, ta thodam llenen te prezon sorro llive ta sorro riat ta gia te sai arakha amen lendar.

¹⁰ A e llene katar o Juda phenena gia: Inai zor e llenen kai vazden o pharipe soke si but barra, ta nasti ka vazda gava zido.

¹¹ Amare dusmanura mislina kai amen ni ka llana, ta kai ni ka dikha len kana ka den te mundaren amen ta te achaven o rado.

¹² A kana e judiura kai zivin pasa lende avile te phenen amenge po des droma kai gola llene ka aven te mundaren amen,

¹³ ondaka phendem e llenenge te thovenpe pe familiaia pala o zido, ta pe thana kai si mai tele, ta kote kai si putardo o zido, te inllaren e jarnie, e lanse ta e arkura.

¹⁴ Ta kana dikhlem kai amare llene saia lenge dar, ustilem ta phendem e glamnenge, e gazdenge ta sa e foroke: Na daran lendar. Den tumen golli kai o Del si baro ta del dar. Goleke, maren tumen pala tumare phlal, pala tumare chaurre, pala tumare chorra, pala tumare rromia, ta pala tumare chera.

¹⁵ Kana amare dusmanura llangle kai sama lacharde, ta kai o Del murisarda so mangena te cheren, amen irisailam kai o zido, suako lleno pe po rado.

¹⁶ Ta kotar angle, dopas katar me llene radina po zido, ta o gua dopas inllarela pasa pe lanse, eskudura, arkura ta chechermave sastrune. A e llene kai gazdarina ta sea pala lende, pomozina e llenen katar o Juda kai radina po zido,

¹⁷ e llene kai inllarena pharipe, iekhe vastea radina, a ogole vastea inllarena o jarni.

¹⁸ Sa e llene kai radina saia len iek jarni po kavisi, ta pasa ma saia o lleno kai basalel e tuturuga,

¹⁹ soke me phendema e glamnenge ta e gazdenge, ta sa e foroke: O rado si but baro, ta amen sam rispime po zido, ta sam fulade iek everetar.

²⁰ Goleke, kana ka asunen kai basel e tuturuga, aven kote kai sam amen, ta amaro Del ka marelpe cheres amende.

²¹ Goleke dopas katar e llene radina sorro llive, a o gua dopas katar e llene inllarena ande pe va e lanse.

²² Ta isto ondaka phendem e llenenge katar o foro, kai saurre saia te nakhen e riat andre ando Jerusalem e llenenchar kai pomozin len, ta gia te arakhen amen orachaia, ta te sai radin ollivesea.

²³ A ni me, ni mi familia, ni e llene kai pomozina man, ni e llene kai arakhena ta llana manchar, ni ikanaia amendar amare patave, ikanaia len samo kana naivaia.