Nejemias 2 - Biblia ande chib Romani

O Artajerjes mukel te llal o Nejemias ando Jerusalem

¹ Iek llive katar o chon Nisan, kana cherela bis burs kai charoila o Artajerjes, me thovava leke mol, ta sar nikada ni dikhlaia man tristome,

² puchla man: Dikhav tut but tristome, ¿So si chuke? Ni dikho nasualo, chuke si varesavi nuzda. Ondaka darailem zurale.

³ Ta phendem e charoke: ¡Te zivil ostade o charo! ¿A sar ni ka avav tristome, kana a o foro kai si e limoria katar mi familia si sa phago ta leke udara phabarde len?

⁴ Ta o charo puchla man: ¿So mange te cherav pala tute? Ondaka molisailem e Devleke kai si ando miloso,

⁵ ta phendem e charoke: Te mangea tu charo, ta te sem lacho chuke, mangav tutar te bichale man ando Juda, ando foro kai si e limoria katar mi familia, te sai vazdav pale o foro.

⁶ O charo kai pasa lete saia leki lluvli e charoina, phenda mange: ¿Gachin vreme trubul tut? ¿Kana ka iri tut? Me phendem leke kana, ta vou mukla man te llav.

⁷ Ta i phendem leke, kai te mangela vou, te bichalel iek lil e llenenge kai gazdarina leke ande phuvia kai si pe ogoia rig katar e len Eufrates, te sai muken man te resav ando Juda,

⁸ ta te del man aver lil te dav le kai o Asaf, kai arakhel o vos e charoko, te sai del man kasta te lacharav e udara katar e torre kai saiapasa o cher e Devleko, ta i e zidura katar o foro ta o cher kai saia te ziviu me. Ta o charo cherda so manglem letar, soke e Devleke avila zalba mandar ta pomozisarda man.

⁹ Kana avilem kai e llene kai gazdarina pe ogoia rig katar o pai o Eufrates, diem lende o lil e charoko, ta o charo bichalda te llan manchar llene pe gra, ta avile lenchar e gazda katar e boñikura.

¹⁰ A kana llangle gaia ezgoda o Sanbalat katar o Joron ta o Tobias, kai saia sluga amonita, jolaile but soke avilem te pomoziu e israelitonen.

O Nejemias avel ando Israel

¹¹ Avilem ando Jerusalem. Ta pala e trin llive,

¹² ustilem orachaia nesave llenenchar, ta ni phendem nikake so thoda o Del ande mo lio te cherav pala o Jerusalem. Samo iek magarcho inllarava, gua kai llava me pe lete.

¹³ Isto goia riat likistem katar o udar kai del kai e bari umal, nakhlem katar o pai kai likel katar e phuv kai ikhardol Iagartano, ta avilem kai o udar katar o llubri, ta dikhlem o zido katar o Jerusalem, kai saia peradino ta leke udara phabarde.

¹⁴ Mapalal llelem karing o udar e paieko kai likel katar e phuv, ta kote kai chidiniaol o pai e charoko, a nasti llelem soke o magarcho ni serela te nakhel kotar.

¹⁵ Mapalal, isto orachaia, llelem upre e paiea, ta kana dikhlem o zido, irisailem ta diem katar o udar katar e bari umal.

¹⁶ E gazda ni llangle kai llelem ni so cherava, a me ni phendem niso e judionenge. Maskar lende sea popura, ta i lache llene, gazda, ta llene kai avilea te pomozin.

¹⁷ Ta phendem lenge gia: Tumen llanen savi nuzda si amen, o Jerusalem si sa phago ta leke udara si phabarde. Aven manchar ta ka vazda pale e zidura katar o Jerusalem, te na maren amendar ios espurnia.

¹⁸ Ta kana phendem e llenenge sar e Devleke avila zalba mandar ta pomozisarda man, ta so phenda mange o charo, von phende mange gia: ¡Aven te radi ta te vazda o foro! Ta pherde vlaga, dena zor iek avere.

¹⁹ A kana llangla gaia orba o Sanbalat katar o Joron, o Tobias amonita kai saia sluga, ta o Gesem o arabe, marde amendar espurnia, ta phende amenge jolinaia: ¿So mangen te cheren? ¿Ni kamen te kanden e charo?

²⁰ A me phendem lenge: O Del e milosoko ka cherel te dobi. Amen kai sam leke sluge, ka radi ta ka vazda pale o Jerusalem, soke tumen inai tumen than, ni pe so te gazdarin kate, ta niko ni pinllarel tumen ando Jerusalem.